ދައުލަތުގެ އާންމު މަންފާއަށްޓަކައި ހާސިލުކުރަން ބޭނުންވާ އިގްތިސާދީ އަދި އިޖުތިމާއީ ސިޔާސަތުތަކުގެ ދަށުން ހިންގާނެ މުހިންމު މަޝްރޫއުތައް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ކަނޑައަޅުއްވައި، އެކަން އިއުލާނު ކުރައްވައިފިއެވެ. މިއީ ދިވެހިރާއްޖޭގެ ޓޫރިޒަމާބެހޭ ގާނޫނުގެ ދަށުން، ސަރުކާރުން ކަނޑައަޅާ މުހިންމު މަޝްރޫއުތަކާއި އެ މަޝްރޫއުތަކަށް އިންވެސްޓް ކުރަންޖެހޭ އެންމެ މަދު މިންވަރު ބަޔާންކޮށް ކޮންމެ އަހަރަކު ނެރެންޖެހޭ ގަރާރެކެވެ.
މި ގަރާރުގައި ފަތުރުވެރިކަމާއި މަދަނީ އުދުހުންތަކުގެ ދާއިރާއިން ފަސް މަޝްރޫއެއް ހިމަނާފައިވެއެވެ. އޭގެ ތެރޭގައި އައްސޭރި ޓޫރިޒަމް މަޝްރޫއު ހިންގުމާއި، ކޮންމެ އަތޮޅެއްގައި ނޭޗަރ ޕާކެއް ތަރައްގީކުރުމާއި، ހެރިޓޭޖް ޓޫރިޒަމް ކުރިއަށް ގެންދިއުން ހިމެނެއެވެ. މީގެ އިތުރުން ރާއްޖޭގެ އެކި ސަރަހައްދުތަކުގައި ޑޮމެސްޓިކް އަދި އިންޓަނޭޝަނަލް އެއަރޕޯޓްތައް ތަރައްގީކުރުމާއި މިހާރު ހުރި އެއަރޕޯޓްތައް އަޕްގްރޭޑް ކުރުންވެސް މި ލިސްޓުގައި ހިމެނެއެވެ.
ދާޚިލީ ސަލާމަތާއި ދިފާއީ ދާއިރާއިން ފާހަގަކޮށްލެވޭ މުހިންމު މަޝްރޫއުތަކެއް ވެސް ރައީސް ވަނީ ކަނޑައަޅުއްވާފައެވެ. އެގޮތުން ކުށަށް އަރައިގަތުމުގެ ނުރައްކަލުގައިވާ ކުދިންނަށް ފަރުވާ ދިނުމަށް “އުންމީދު / ހޯޕް އައިލެންޑް” ތަރައްގީކުރުމަށް އުތުރުތިލަފަޅުން ބިން ހިއްކުމާއި، އެތަން ތަރައްގީކުރުމުގެ މަޝްރޫއު ހިމެނެއެވެ. އަދި ހަމަ އެ ސަރަހައްދުގައި “ސެންޓްރަލް ޕްރިޒަން ކޮމްޕްލެކްސް” އެއް ބިނާކުރުމަށް ބޭނުންވާ ބިން ހިއްކުމާއި އިމާރާތް ކުރުމުގެ މަސައްކަތްވެސް ވަނީ ތާވަލުކުރެވިފައެވެ.
ބިނާރާއި ގެދޮރުވެރިކަމުގެ ދާއިރާއިން ހަތަރު މަޝްރޫއެއް ހިމަނާފައިވާއިރު، އޭގެ ތެރޭގައި ރަށްރަށް ކޯޒްވޭއިން ގުޅާލުމާއި، ސޯޝަލް ހައުސިންގ މަޝްރޫއުތަކާއި، ބިން ހިއްކުމުގެ އިތުރުން ހިއްކާފައިވާ ރަށްރަށުގައި މަގާއި ޔުޓިލިޓީ ހިދުމަތްތައް ގާއިމުކުރުން ހިމެނެއެވެ. މީގެ އިތުރުން ޒުވާނުންނާއި ކުޅިވަރުގެ ދާއިރާއިން ހައިޕަރޕޯމަންސް ސެންޓަރުތައް ގާއިމުކުރުމުގެ މަޝްރޫއުވެސް ރައީސް ވަނީ ކަނޑައަޅުއްވާފައެވެ.
ތިމާވެއްޓާއި ހަކަތައިގެ ދާއިރާއިން ރަށްރަށުގެ ފެނާއި ނަރުދަމާގެ ނިޒާމު އަޕްގްރޭޑް ކުރުމާއި، 50 ރަށެއްގައި ކޮމްޕޯސްޓިންގ ޕްލާންޓް ގާއިމުކުރުމުގެ އިތުރުން 10 ރަށެއްގައި ކުނި މެނޭޖުކުރާ މަރުކަޒުތައް ބިނާކުރުން ހިމެނެއެވެ. މި މަޝްރޫއުތަކަކީ ދައުލަތުގެ އިގްތިސާދީ އަދި އިޖުތިމާއީ ކުރިއެރުމަށްޓަކައި ސަރުކާރުން ހާއްސަ އިސްކަމެއް ދީގެން ކުރިއަށް ގެންދަން ނިންމާފައިވާ މުހިންމު މަސައްކަތްތަކެއްކަން ފާހަގަކުރެވެއެވެ.