ރާއްޖެއިން ތެލަށް ބަރޯސާވާ މިންވަރު ކުޑަކުރުމަށާއި، ތެޔޮ އެތެރެކުރުމަށް ކުރާ ޚަރަދު ކުޑަކުރުމާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ވޯލްޑް ބޭންކުން ދެކުނު އޭޝިއާއަށް ކަނޑައަޅާފައި ހުންނަވާ ނައިބު ރައީސް ޖޮހާނަސް ޒަޓް އާއި މަޝްވަރާކުރައްވައިފިއެވެ.
މި މަޝްވަރާތައް ކުރިއަށްދިޔައީ ނައިބު ރައީސް ޖޮހާނަސް ޒަޓް، ރައީސުލްޖުމްހޫރިއްޔާގެ އަރިހަށް މުލީއާގޭގައި ކުރެއްވި އިޙްތިރާމުގެ ޒިޔާރަތުގައެވެ.
ރައީސުލްޖުމްހޫރިއްޔާގެ އޮފީހުން މަޢުލޫމާތު ދެއްވި ގޮތުގައި، މި ބައްދަލުވުމުގައި ވޯލްޑް ބޭންކުން ރާއްޖެއަށް ދެމުންގެންދާ އެހީތެރިކަމާއި، ޑިޖިޓަލައިޒޭޝަން އަދި ހަކަތައިގެ ދާއިރާ ހަރުދަނާކުރުން ހިމެނޭހެން ސަރުކާރުން އިސްކަންދޭ މުހިންމު ދާއިރާތަކާ ގުޅޭގޮތުން މަޝްވަރާކުރެވުނެވެ.
ރައީސް މުޢިއްޒު ވަނީ ތެލަށް ބަރޯސާވާ މިންވަރު ކުޑަކުރުމަށާއި ތެޔޮ އެތެރެކުރުމުގެ ޚަރަދުތައް މެނޭޖްކުރުމަށްޓަކައި، އިއާދަކުރަނިވި ހަކަތަ ބޭނުންކުރާ މިންވަރު އިތުރުކުރުމުގެ މުހިންމުކަން ފާހަގަކުރައްވާފައެވެ. މީގެއިތުރުން ޞިއްޙީ ދާއިރާއާއި ތަރައްޤީގެ އެކި މަޝްރޫޢުތަކަށް ވޯލްޑް ބޭންކުގެ އެހީތެރިކަން ހޯދުމާ ގުޅޭގޮތުންވެސް ވާހަކަދެކެވުނުއިރު، ރައީސް ވަނީ ޤައުމުގެ ދިގުމުއްދަތުގެ ބޭނުންތަކާ އެއްގޮތްވާ ދެމެހެއްޓެނިވި މަޝްރޫޢުތަކުގެ މުހިންމުކަން ފާހަގަކުރައްވާފައެވެ.
ވޯލްޑް ބޭންކުގެ ނައިބު ރައީސް ޒަޓް ވަނީ ރާއްޖެއަށް އެހީތެރިކަން ބޭނުންވާ ދާއިރާތަކުން އެއްބާރުލުން ދިނުމަށް ވޯލްޑް ބޭންކް ތައްޔާރަށް އޮތްކަން ހާމަކުރައްވާފައެވެ. އަދި ބޭރުން ތެޔޮ އެތެރެކުރުމުން ކުރިމަތިވާ އިޤްތިޞާދީ ނުރައްކާތައް ކުޑަކުރުމަށްޓަކައި، އިއާދަކުރަނިވި ހަކަތަ ފުޅާކުރުމުގެ ފުރުޞަތުތައް ހުރިކަން އޭނާ ފާހަގަކުރެއްވިއެވެ.
ވޯލްޑް ބޭންކުގެ އެންމެ ފަހުގެ މޯލްޑިވްސް ޑިވެލޮޕްމަންޓް އަޕްޑޭޓް ރިޕޯޓުގައި، ތަކެތި އެތެރެކުރުމުގެ ޚަރަދު ބޮޑުވެ ބޭރު ފައިސާއަށް އޮތް ޕްރެޝަރު ދެމިއޮންނާނެ ކަމަށް ލަފާކޮށްފައިވާއިރު، ޤައުމުގެ އިޤްތިޞާދީ ވިލުންތެރިކަން އިތުރުކުރުމަށްޓަކައި ތެލަށް ބަރޯސާވާ މިންވަރު ކުޑަކުރުމަކީ ނުހަނު މުހިންމު ކަމެއްކަން ވަނީ ބަޔާންކޮށްފައެވެ.