ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސްކަމުގެ މަޤާމަށް އަލުން އިންތިޚާބުވެވަޑައިގަތުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލީޑަރޝިޕްގެ ދަށުން 2028 ވަނަ އަހަރު ޕީއެންސީގެ ސަރުކާރެއް ޤާއިމުކުރުމަށް އައު އަޒުމަކާއެކު މަސައްކަތްކުރައްވާނެ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ޕީއެންސީގެ ކޮންގްރެސްގައި ބޭއްވުނު އެތެރޭގެ އިންތިޚާބުގައި 833 ވޯޓު ހޯއްދަވައިގެން، ޕާޓީގެ 6 ނައިބު ރައީސުންގެ ތެރޭގައި ސަޢީދު ވަނީ އޭނާގެ މަޤާމު ދިފާޢުކުރައްވާފައެވެ. މި މަޤާމުތަކަށް ޖުމްލަ 8 ކެންޑިޑޭޓުން ވާދަކުރެއްވިއެވެ.
އިންތިޚާބު ކާމިޔާބު ކުރެއްވުމަށްފަހު ސަޢީދު ވަނީ ޕީއެންސީގެ މެންބަރުން އޭނާއަށް ދެއްވި އިތުބާރާއި ތާއީދަށް ޝުކުރު އަދާކުރައްވާފައެވެ. އަދި ޕީއެންސީގެ ރައީސް، ޑރ. މުޙައްމަދު މުޢިއްޒުގެ ލީޑަރޝިޕްގެ ދަށުން ކުރިއަށްވުރެ ބޮޑު ހިތްވަރަކާއި ޖޯޝަކާއި އަޒުމަކާއެކު ސިޔާސީ މަސައްކަތް ކުރިއަށް ގެންދަވާނެ ކަމަށް އޭނާ ވިދާޅުވިއެވެ.
ސަޢީދު އިތުރަށް ވިދާޅުވީ، އޭނާގެ މައިގަނޑު އަމާޒަކީ 2028 ވަނަ އަހަރު ޕީއެންސީގެ ވެރިކަމެއް ދެމެހެއްޓުމަށާއި، ދިވެހި ރައްޔިތުންނަށް ތަރައްޤީއާއި ފާގަތިކަން ހޯދައިދިނުމަށް މަސައްކަތް ކުރެއްވުން ކަމަށެވެ.
ސަޢީދުގެ އިތުރުން ޕީއެންސީގެ ނައިބު ރައީސްކަމަށް އިންތިޚާބުވެވަޑައިގެންނެވީ ޔޫތު މިނިސްޓަރ ޢަބްދުﷲ ރާފިޢު، ފިޝަރީޒް މިނިސްޓަރ އަޙްމަދު ޝިޔާމް، ނިލަންދޫ ދާއިރާގެ މެންބަރު ފާޠިމަތު ސަޢުދާ، ބާރަށު ދާއިރާގެ މެންބަރު އިބްރާހީމް ޝުޖާޢު އަދި ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފެވެ.
މި އިންތިޚާބުގައި ރާފިޢުއަށް 968 ވޯޓު ލިބިވަޑައިގެންނެވިއިރު، ޝިޔާމަށް 964 ވޯޓު، ސަޢުދާއަށް 923 ވޯޓު، ޝުޖާޢުއަށް 862 ވޯޓު، ސަޢީދަށް 833 ވޯޓު އަދި ޝަރީފަށް ވަނީ 780 ވޯޓު ލިބިވަޑައިގެންފައެވެ. ސެޕްޓެމްބަރ 15 އިން 18 އަށް މާލޭގައި ކުރިއަށްދާ މި މަހާސިންތާގައި ޕާޓީގެ ހިންގުމާ ގުޅޭ އެހެނިހެން މުހިންމު ނިންމުންތަކާއި މަޤާމުތަކަށް މީހުން ހޮވުން ކުރިއަށްދެއެވެ.