އިލެކްޝަންސް ކޮމިޝަނުން ބާއްވާ އިންތިހާބުތަކުގައި، ކެންޑިޑޭޓެއްގެ މަންދޫބެއް، އޮބްޒާވަރެއް ނުވަތަ މޮނީޓަރެއްގެ ގޮތުގައި ހަރަކާތްތެރިވާ ފަރާތްތަކުން، އިންތިޚާބީ ކުށެއް ކޮށްފައިވާނަމަ އެމީހަކަށް އިންތިޚާބުގައި ހަރަކާތްތެރި ނުވެވޭގޮތަށް އިލެކްޝަންސް ކޮމިޝަނުން ގަވައިދު އިޞްލާހުކޮށްފިއެވެ.
އިންތިހާބެއްގައި ވޯޓު ލާ ދުވަހު އޮބްޒާވަރެއް ނުވަތަ މޮނިޓަރެއް ނުވަތަ ކެންޑިޑޭޓުން އައްޔަނުކުރާ މަންދޫބެއްގެ ހައިސިއްޔަތުން ހަރަކާތްތެރިވުމަށް ހުށަހަޅާ މީހަކީ، އޮބްޒާވަރުންނާއި، މޮނިޓަރުންނާއި، ކެންޑިޑޭޓުން އައްޔަނުކުރާ މަންދޫބެއްގައި ހުރުން ލާޒިމްކުރާ ޝަރުޠުތައް ފުރިހަމަވާ މީހެއްކަމުގައި ވާން ވާނެކަމަށް އިންތިޚާބުތަކާބެހޭ އާންމު ގަވާއިދުގައި ބަޔާންކޮށްފައިވެއެވެ.
އިންތިހާބުތަކުގައި ހަރަކާތްތެރިވާ މީހެއްގެ ކިބައިގާ ހުރުން ލާޒިމް ޝަރުތުތަކަކީ:
އުމުރުން 18 އަހަރު ފުރިފައިވާ ދިވެއްސެއް ކަމުގައިވުން.
ޖިނާއީ ކުށެއްގެ ހުކުމް ތަންފީޒު ކުރެވެމުންދާ މީހެއްކަމުގައި ނުވުން.
އެ އިންތިޚާބަކާބެހޭ އެއްވެސް މަސައްކަތެއް ކުރުމަށް އިލެކްޝަންސް ކޮމިޝަނުގެ ފަރާތުން ހަވާލުވެގެން ހުރި މީހެއްކަމުގައި ނުވުން.
ފަނޑިޔާރެއް ނުވަތަ މިނިވަން މުއައްސަސާއެއްގެ މެންބަރެއް/ ވެރިއެއް ކަމުގައި ނުވުން.
ދިވެހި ފުލުހެއް ކަމުގައި ނުވަތަ ސިފައިންގެ މީހެއް ކަމުގައިނުވުން.
ކުށެއްގެ ތުހުމަތުގައި ބަންދުކޮށްފައި ހުރި މީހަކު ކަމުގައިނުވުން.
އިންތިހާބުގައި އިތުރު މަގާމަކަށް ކުރިމަތިލައިފައިވާ މީހެއް ކަމުގައިނުވުން.
ނަމަވެސް އިލެކްޝަންސް ކޮމިޝަނުން އެ ޤަވާއިދަށް ގެނައި އިޞްލާހުގައި ވަނީ އިންތިޚާބުތަކުގައި އޮބްޒާވަރެއް ނުވަތަ މޮނިޓަރެއް ނުވަތަ ކެންޑިޑޭޓުން އަދި މަންދޫބުންގެ ގޮތުގައި ހަރަކާތްތެރިވާ މީހަކީ އޭނާގެ މައްޗަށް އިންތިޚާބީ ކުށެއް، ފާއިތުވި ފަސް އަހަރުދުވަހުގެ ތެރޭގައި ސާބިތުވެފައިވާ މީހެއްނަމަ، ނުވަތަ އިންތިޚާބުގައި ޢަމަލުކުރަންޖެހޭ ސުލޫކީ
މިންގަނޑާ ޚިލާފުވެފައިވާކަން އިލެކްޝަންސް ކޮމިޝަނަށް ސާބިތުވެފައިވާ މީހެއްނަމަ، އެ މީހަކަށް އިންތިޚާބުގައި އޮބްޒާވަރެއްގެ ގޮތުގައި، ނުވަތަ މޮނިޓަރެއްގެ ގޮތުގައި،
ނުވަތަ ކެންޑިޑޭޓުންގެ މަންދޫބެއްގެ ގޮތުގައި ހަރަކާތްތެރިވުމުގެ ހުއްދަ ދޫނުކުރުމުގެ އިޚްތިޔާރު، އިލެކްޝަންސް ކޮމިޝަނަށް ލިބިގެންވާކަމަށެވެ.