ވޯލްޑް ޓްރެވަލް އެވޯޑްސްގެ ވޯލްޑް ލީޑިންގ ގްރީން ޑެސްޓިނޭޝަން އެވޯޑް ފުރަތަމަ ފަހަރަށް ރާއްޖެއަށް ލިބިއްޖެއެވެ.
ޕޯޗުގަލްގެ މަދޭރާގައި ބޭއްވުނު ވޯލްޑް ޓްރެވަލް އެވޯޑްސްގެ ގްރޭންޑް ފައިނަލް ގާލާގައި ރާއްޖެއިން ވަނީ މި އެވޯޑުގެ އިތުރުން އެހެން ގިނަ އެވޯޑްތަކެއްވެސް ހޯދާފައެވެ. ވޯލްޑް ލީޑިންގ ގްރީން ޑެސްޓިނޭޝަން އެވޯޑަކީ ތިމާވެއްޓާ ރައްޓެހި އަދި ދެމެހެއްޓެނިވި ފަތުރުވެރިކަމެއް ހިންގާ މަންޒިލްތަކަށް ދެވޭ ޚާއްޞަ އެވޯޑެކެވެ.
މި ކާމިޔާބީއާ ގުޅިގެން ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވެފައިވަނީ މިއީ ފަތުރުވެރިކަމުގެ ދާއިރާގައި ހިމެނޭ އެންމެހައި ފަރާތްތަކުން އެކުގައި ކުރެވުނު މަސައްކަތުގެ ނަތީޖާއެއް ކަމަށެވެ. އޭގެ ތެރޭގައި ރިސޯޓުތަކާއި، ޑައިވް ސެންޓަރުތަކާއި، އެއަރލައިންތަކާއި، ޓްރެވަލް އޭޖެންސީތަކާއި، ޓުއަރ ގައިޑުންނާއި، ދާއިރާގައި މަސައްކަތްކުރާ އެންމެހައި މުވައްޒަފުންގެ އިތުރުން މުޅި މުޖުތަމަޢު ހިމެނޭކަމަށް ވަޒީރު ފާހަގަކުރެއްވިއެވެ.
މި އެވޯޑު ލިބުމުން ދައްކުވައިދެނީ ރާއްޖޭގެ ޤުދުރަތީ ވެށި ރައްކާތެރިކުރުމަށާއި ދެމެހެއްޓެނިވި ފަތުރުވެރިކަމުގެ އާދަތައް ކުރިއެރުވުމަށް ރާއްޖެއިން ދޭ އަހައްމިއްޔަތުކަން ބައިނަލްއަޤްވާމީ ފެންވަރުގައިވެސް ބަލައިގަނެވިފައިވާކަން ކަމަށާއި، ރާއްޖެއަށް ދުނިޔޭގެ ފެންވަރުގައި ލިބިފައިވާ ކާމިޔާބީގެ ފަހަތުގައިވަނީ ފަތުރުވެރިންނަށް ދެވޭ ޚިދުމަތްތަކުގެ ފެންވަރު ހިފެހެއްޓުމަށް ކުރެވޭ މަސައްކަތްތަކާއި ތިމާވެށި ރައްކާތެރިކުރުމަށް ކުރެވޭ މަސައްކަތްތައްކަންވެސް ވަޒީރު ފާހަގަކުރެއްވިއެވެ.
މި ހަފްލާގައި ރާއްޖެއިން ވަނީ ވީލްޑް ލީޑިން ޑެސްޓިނޭޝަންގެ އެވޯޑް ޖެހިޖެހިގެން ފަސްވަނަ ފަހަރަށް ކާމިޔާބުކޮށްފައެވެ.