އިންޑިއާގެ މަޝްހޫރު ލަވަކިޔުންތެރިޔާ ގެރީ ސަންދު އޮސްޓްރޭލިއާގައި ހިނގަމުންދިޔަ ކޮންސަޓެއްގައި ލަވަކިޔަމުންދަނިކޮށް ހަމަލާއެއް ދީފިއެވެ. މި ހާދިސާ ހިނގާފައިވަނީ އޭނާގެ މިހާރު ކުރިއަށްދާ ޓުއަރގެ ތެރެއިން ނިއު ސައުތު ވޭލްސްގައި ބޭއްވުނު ކޮންސަޓެއްގައެވެ.
މި ހައިރާންކުރުވަނިވި ހާދިސާ ހިނގާފައިވަނީ އެއް ފޭނަކު ސްޓޭޖަށް އަރައި ސަންދުއަށް ހަމަލާދިނުމުންނެވެ. އޭނާގެ ފޭނުން ބުނާ ގޮތުގައި މި ހަމަލާ ދިނުމުގެ ކުރިން ސަންދު ދެއްކި އިޝާރާތަކުން ފޭނު ރުޅިއައިސްފައިވެއެވެ.
ނަމަވެސް، ސަލާމަތީ ބެލެހެއްޓުމާއި ފުލުހުންގެ އަވަސް ފިޔަވަޅުތަކާ ގުޅިގެން ހަމަލާދިން ފަރާތް ވަގުތުން ހިފެހެއްޓި، އަދި ފަހުން ހައްޔަރުކުރެވުނެވެ. ކުޑަ ވަގުތުކޮޅަކަށް ހިނގި މި ހަމަލާއަށްފަހު ސަލާމަތީ ބެލެހެއްޓުމުން ސަންދު ސަލާމަތްކޮށް، ދުރަށް ގެންދެވުނެވެ.
މި ހާދިސާއާ ގުޅޭ ގޮތުން ސަންދު އަދި ރަސްމީ ބަޔާނެއް ދީފައެއް ނުވެއެވެ. ނަމަވެސް މި ހާދިސާގެ ވީޑިއޯތައް ސޯޝަލް މީޑިއާގައި ވަރަށް ބާރު ސްޕީޑެއްގައި ފެތުރެމުންދާއިރު، ފޭނުންގެ ތަފާތު ރައްދުތައް ފެންނަމުންދެއެވެ.
ޖަލަންދަރު، ޕަންޖާބުގައި އުފަން ސަންދު މިހާރު ދިރިއުޅެމުންދަނީ ޔޫކޭގައެވެ. އަދި އިންސްޓަގްރާމްގައި 5.3 މިލިއަނަށްވުރެ ގިނަ ފޮލޯވަރުން އޭނާގެ އެކައުންޓުގައި ތިބިކަން ފާހަގަކޮށްލެވެއެވެ.
މިފަދަ ހާދިސާތައް މީގެ ކުރިންވެސް ހިނގާފައިވެއެވެ. މިގޮތުން ތައުބާ ތައުބާ ލަވަކިޔުންތެރިޔާ ކަރަން އައުޖްލާއަށް ލަންޑަނުގައި ބޭއްވުނު ކޮންސަޓެއްގައި ހަމަލާދީފައިވާއިރު، ސޯނު ނިގަމްއަށް ސްޓޭޖުގައި ހުއްޓާ ހަމަލާދޭން މަސައްކަތްކޮށްފައިވެއެވެ.