ސްޓެލްކޯގެ މުވައްޒަފުން ރިޓަޔަރމަންޓާއި ހަމައަށްދިޔަ ނަމަވެސް ކުންފުންޏާއި، ޤައުމަށް އެ މުވައްޒަފުންގެ ޚިދުމަތް ކޮންމެވެސް ސިފައެއްގައި ލިބިގެންދާނެ ގޮތްތަކެއް ހަމަޖެއްސުމަށް މަޝްވަރާކޮށްފައިވާކަމަށް ސްޓެލްކޯއިން ބުނެފިއެވެ.
މި މަޝްވަރާތައް ކުރިއަށް ގެންގޮސްފައިވަނީ ސްޓެލްކޯގެ ޚިދުމަތުގައި 35 އަހަރަށްވުރެ ގިނަ ދުވަހު ދެމިތިއްބެވި މުވައްޒަފުންނާއި، މެނޭޖިންގ ޑިރެކްޓަރ ހުސެއިން ފަހުމީ ބޭއްވި ބައްދަލު ކުރެއްވުމުގެ ތެރެއިންނެވެ. އިއްޔެ ބޭއްވި މި ބައްދަލުކުރެއްވުމުގައި އެ ކުންފުނީގެ އިސްވެރިންވެސް ބައިވެރިވެވަޑާއިގެންފައި ވެއެވެ.
މި ބައްދަލުކުރެއްވުމުގައި ސްޓެލްކޯގެ އެމްޑީ ފަހުމީ ވަނީ އެ މުވައްޒަފުންގެ ޤައުމީ އެ ޚިދުމަތްތަކަކީ އަގު ނުކުރެވޭފަދަ ޚިދުމަތްތަކެއް ކަމާއި، އެއީ ކުންފުނީގެ ތާރީޚާއި ކުރިމަގުގެ އިތުރުން ކާމިޔާބީއާއިވެސް ގުޅިފައިވާ ޚިދުމަތްތަކެއްކަން ފާހަގަ ކުރައްވާ ޝުކުރުއަދާކުރައްވާފަ އެވެ.
ސްޓެލްކޯއިން ދަނީ މުވައްޒަފުންގެ ކުރިއެރުމަށްޓަކައި ގިނަ ކަންކަން ތައާރަފްކުރަމުންނެވެ. އެގޮތުން އެ ކުންފުޏަށް 15 އަހަރު ހިދުމަތް ކޮށްދީފައިވާ މުވައްޒަފުންގެ ކުރިމަތިލާ މުވައްޒަފުންނަށް އެ ކުންފުނިން އަންނަނީ ގުރުއަތުން ހޮވައިގެން ހައްޖުގެ އަޅުކަމުގެ ފުރުސަތު ވެސް ދެމުންނެވެ.