ކުރީގެ ސަރުކާރުން ހިންގާފައިވާ މަޝްރޫތައް މި ސަރުކާރުން ވެރިކަމަށް އައިފަހުން ހުއްޓާލާފައިވާ ކަމަށް ދައްކާ ވާހަކައަކީ އިދިކޮޅު ފަރާތްތަކުން ހަދަމުންދާ އެންމެ ބޮޑު ދޮގު ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
“ރައީސްގެ ޖަވާބު” ޕްރޮގްރާމަށް އާންމު ފަރާތަކުން ދެންނެވި ސުވާލަކަށް ޖަވާބުދެއްވަމުން ރައީސް ވިދާޅުވީ މިއީ އެމަނިކުފާނާއި ދެކޮޅަށް އިދިކޮޅު ފަރާތްތަކުން ފަތުރާ ހަޤީގަތާ ޚިލާފު ވާހަކަތަކުގެ ތެރެއިން އެންމެ ބޮޑު އެއްވާހަކަ ކަމަށެވެ.
ވެރިކަމާއި ހަވާލުވިއިރުވެސް އެ ފާހަގަކުރާ ޕްރޮޖެކްޓްތައް އޭރުގެ ސަރުކާރުގެ ދުވަސްވަރުވެސް ހުރީ ހުއްޓިފައިކަމަށާއި، މިކަންކަމަށް އެ ރަށްރަށުގެ ރައްޔިތުން ހެކިވެވަޑައިގަންނަވާނެކަމަށް ރައީސް ވަނީ ވިދާޅުވެފައެވެ.
އަދި ރިޔާސީ ކެމްޕެއިން ތެރޭގައި އެކި ރަށްރަށައް ވަޑައިގެންނެވިއިރު ކޮންމެ ރަށެއްގައި ކަހަލަގޮތަކަށް މަޝްރޫއުތައް ހުރީ ހުއްޓިފައިކަމަށް ވެސް ރައީސް ވިދާޅުވިއެވެ.
“ގާތްގަނޑަކަށް ރާއްޖޭގެ ހުރިހާ ރަށަކަށް ދެވުނު އަޅުގަނޑާ ނައިބު ރައީސްއާއި ދެ މީހުންގެ މައްޗަށް ބަހާލައިގެން. ކޮންމެ ރަށެއްގައި ވެސް ހުރީ މަޝްރޫތައް ހުއްޓިފަ. މަޝްރޫތަކެއް ނުހިނގާ، ގިނަ މަޝްރޫތައް ހުރީ ހަމަ އެކި ސަބަބުތަކާ ހެދި ހުއްޓިފައި. އަޅުގަނޑަށް ފެނުނު ރަށްރަށުގައި ފެނާއި ނަރުދަމާގެ ހޮޅިތައް މަގުމަތީގައި ހުރިއިރު މަސައްކަތް ކުރާނެ މީހަކު ނެތް. މަގު ހަދަން ފަށާފައި މީހެއްގެ ހިލަމެއް ނެތް. މިހެން ހުރި ބަނދަރުތަކުގެ މައްސަލަ، ސްކޫލް އިމާރާތް ފަށާފައި އޮނިގަނޑުން ކޮންމެވެސް ވަރެއް ނިންމާފައި. އަހާލީމަ މީގެ ދެ އަހަރު ކުރިން ހުއްޓިފައި ކަމަށް ބުނަނީ ހެލްތް ޕޯސްޓުތައް، ހެލްތް ސެންޓަރުތައް އެގޮތަށް. އެގޮތަށް ގޮސް ހުރިހާ މަޝްރޫތަކެއް އޮތީ ހުއްޓިފައި.” ރައީސް ވިދާޅުވިއެވެ.
ރައީސް ވިދާޅުވީ، އެއިރު ކަންކުރި ގޮތަކީ ތިން ހަތަރު ފަހަރު މިގޮތައް ހުއްޓިފައި ހުރި މަޝްރޫއުތައް އެކި ފަރާތްތަކަށް ހަވާލުކުރުންކަމަށެވެ. އަދި އެތައް ބަޔަކަށް ފައިސާ ނުދީ ހުރިކަމަށާއި، އޭގެ ސަބަބުން ކުންފުނިތަކަށް މަސައްކަތް ކުރިއަށްގެންދިއުމަށް ދަތިތަކާއި ކުރިމަތިވެފައިވާކަމަށެވެ.
އަދި ހުއްޓިފައި ހުރި މަޝްރޫއުތައް އަލުން ފަށައިގަތީ މި ސަރުކާރުން ވެރިކަމަށް އައުމަށްފަހުގައި ކަމަށާއި، ހުއްޓިފައިވާ ވަރަށް ގިނަ މަޝްރޫއުތައް މިހާރު ފެށިފައިވާކަން ރައީސް ފާހަގަކުރެއްވިއެވެ.
“ބައެއް ރަށްތަކުގައި ކުދިކުދި މަސައްކަތް ހިނގަނީ ބޮޑެތި ސްކޫލް އިމާރާތް މަލްޓި ޕާޕަސް ހޯލް އަޅަން ހަވާލުކޮށްފަ. ފެންނަނީ ވީލް ބަރޯއެއްގައި ދެމީހަކު ވެގެން ސިމެންތި ކޮޅެއް ގަށާލައިގެން ޖަހާ މަންޒަރު. އަޅުގަނޑުމެން އައިސްފައި މި މަޝްރޫތައް ފެއްޓީ. އެތައް ބަޔަކަށް ނުދީ ހުރި ފައިސާ. ފައިސާ ނުދިނީމަ ކިހިނެތްތޯ އެ ފަރާތްތަކަށް މަސައްކަތް ކުރެވޭނީ. ކުދި އަދި މެދުފަންތީގެ ކުންފުނިތައް. އެ މީހުންގެ އަތުގައި ކޭޝްފްލޯ ނެތިއްޔާ މަސައްކަތެއް ނުހިނގާނެ.” ރައީސް ވިދާޅުވިއެވެ.
ރައީސް ވަނީ ވެރިކަމާ ހަވާލުވަވަޑައިގަތީ ރައްޔިތުންނަށް ތަރައްޤީ ގެނެސްދީ ނަތީޖާ ނެރެދޭން ކަމަށާއި، ހުރިހައި ސަމާލުކަމެއް އޮތީ ރައްޔިތުންނަށް ތަރައްޤީ ގެނެސްދިނުމަށްކަމަށް ވިދާޅުވެފައެވެ.
އެހެންކަމުން އަދުގެ ސަރުކާރުން މަޝްރޫއުތައް ހުއްޓާލާކަމަށް ބުނުމަކީ މި ސަރުކާރުގެ ސިޔާސަތާއި ވިސްނުމާއި ފިކުރާއި ދިމާ އިދިކޮޅަށް ދައްކާ ވާހަކައެއްކަމަށް ރައީސް ވިދާޅުވިއެވެ.