ކުޑަކުދިންނަށް ކުރާ އަނިޔާ ތަކުރާރުވިޔަ ނުދިނުމަށްޓަކައި ކުރެވެން ހުރި ހުރިހާ ކަމެއް ކުރާނެކަމުގެ ޔަގީންކަން ދޭކަމަށް އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އއ. ރަސްދޫގެ މިސްކިތެއްގައި ކުޑަކުއްޖަކަށް އަނިޔާކުރާ ވީޑިއޯއެއް ދައުރުވުމާ ގުޅިގެން ކަމާގުޅޭ ފަރާތްތަކުން ރޭ ބޭއްވި ނިއުސް ކޮންފަރެންސްގައި، މިނިސްޓަރ ޝަހީމް ވަނީ ކުޑަކުދިންނަށް ހެޔޮކޮށް ހިތުމަކީ އިސްލާމްދީނުގެ އަހްލާގިއްޔާތުގެ ތެރޭ ހިމެނޭ އެންމެ މަތީ އެއް ސިފަކަމަށް ވިދާޅުވެފައެވެ. އަދި މިކަމަކީ އަހަރެމެންގެ މާތް ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ވެސް ނުހަނު ބާރު އަޅުއްވާ ކަމެއްކަމަށް ޝަހީމް ވަނީ ވިދާޅުވެފައެވެ.
“ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ޙަދީޘް ކުރައްވާފައިވަނީ: އަހަރުމެންގެ ތެރޭގައިވާ އިސްރަށްވެހިންނަށް ގަދަރު ނުކުރާ، އަހަރެމެންގެ ތެރޭގައިވާ ކުޑަކުދިންނަށް ލޯބިނުކުރާ މީހުންނަކީ އަހަރެމެންގެ ތެރެއިންވާ ބައެއް ނޫނެވެ.” – ޝަހީމް
އިސްލާމިކް މިނިސްޓްރީގެ ފަރާތުން ކުޑަކުދިންނަށް ކުރާ އަނިޔާ އާއި ދެކޮޅަށް މުޅި ޤައުމު ހޭލުންތެރިކަން އިތުރުކުރުމަށްޓަކައި ވަރަށް ގިނަ މަސައްކަތްތަކެއް ކުރާނެކަމަށް ޝަހީމް ވަނީ ވިދާޅުވެފައެވެ.
އެގޮތުން ހުތުބާތަކުގެ ޒަރިއްޔާއިންނާއިި ދީނީ އެކިއެކި ޕްރޮގްރާމްތަކާއި، ފޯރަމްތަކާއި ބެލެނިވެރިންނަށް ހިންގޭ ޕްރޮގްރާތަކާއި، އަދި އެކި އުމުރުފުރާތަކަށް ބަހައިގެން ގެންދެވޭ އެކިއެކި ތަރުބަވީ ޕްރޮގްރާމްތަކުގެ ތެރެއިން މިފަދަ ކަންތަކަށް އެޑްރެސްކޮށް މިބާވަތުގެ، އަނިޔާ ތަކުރާރު ވިޔަނުދިނުމަށްޓަކައި ކުރެވެން ހުރި ހުރިހާ ކަމެއް ކުރާނެކަމުގެ ޔަގީންކަން ޝަހީމް ވަނީ އަރުވާފަ އެވެ.
ޝަހީމް ވަނީ ކުޑަކުދިންނަށް ލޯބިކޮށް އިހްސާންތެރިކޮށް ހިތުމަކީ މުސްލިމުންގެ ސަގާފަތާއި އަގީދާ އާއި ގުޅިފައިވާކަމެއްގެ ގޮތުގައި ސިފަކުރައްވާފައެވެ. އަދި އާންމުކޮށް މުޅި މުޖުތަމައަކީ ކުލުނުވެރި އޯގާތެރި މުޖުތަމައަކަށްވުން އެއީ އިސްލާމްދީނުގެ ވަރަށް މުހިއްމު މަގްސަދެއްކަމަށް ޝަހީމް ވިދާޅުވިއެވެ.
އަދި ރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް މި މައްސަލަ ވަރަށް ގާތުން ބައްލަވަމުން ގެންދަވާކަމަށް ޝަހީމް ވަނީ ވިދާޅުވެފައެވެ.