އިސްރާއީލުގެ ހަނގުރާމަމަތީ މަތިންދާބޯޓުތަކުން ޣައްޒާގެ އުތުރާއި މެދުތެރެ އަދި ދެކުނުގެ ބައެއް ތަންތަނަށް އިއްޔެ މެންދުރު ދިން ހަމަލާތަކުގައި ކުޑަކުއްޖަކާއެކު އާންމުންގެ 10 މީހަކު ޝަހީދުވެ އެތައް ބަޔަކު ޒަޚަމްވެފައިވާ ކަމަށް އެ ގައުމުގެ މަސްދަރުތަކުން ބުނެފިއެވެ.
ވަފާއިން ރިޕޯޓްކޮށްފައިވާ ގޮތުގައި ޣައްޒާގެ މެދުތެރޭގެ އަލްބުރައިޖް ކޭމްޕްގައި އާންމުންގެ ބަޔަކަށް އަމާޒުކޮށް އިސްރާއީލުން ދިން ވައިގެ ހަމަލާގައި ކުޑަކުއްޖަކާއެކު އާންމުންގެ ފަސް މީހަކު ވަނީ ޝަހީދުވެފައެވެ އެވެ. މި ހާދިސާގައި ޝަހީދުވި މީހުން ވަނީ ކައިރީގައި ހުންނަ ދީރު އަލް ބަލާހްގައި ހުންނަ އަލް އަޤްޞާ ޝަހީދުންގެ ހޮސްޕިޓަލަށް ގެންގޮސްފައެވެ.
ހަމައެއާއެކު އިސްރާއީލުގެ ހަނގުރާމަމަތީ މަތިންދާބޯޓަކުން ޣައްޒާ ސިޓީގެ އަލްނަފާޤް މަގުގައި އާންމުންގެ އެއްވުމަކަށް އަމާޒުކޮށް ދިން ހަމަލާއެއްގައި ފަލަސްތީނުގެ ތިން މީހަކު ޝަހީދުކޮށްލައި އެތައް ބަޔަކު ޒަޚަމްކޮށްލިއެވެ. މި ހާދިސާގައި ޝަހީދުވި އެންމެން ވަނީ އެ ސިޓީގެ އަލް އަހްލީ ބެޕްޓިސްޓް ހޮސްޕިޓަލަށް ގެންގޮސްފަ އެވެ.
އަދި އެންކްލޭވްގެ ދެކުނުގައި އޮންނަ ރަފާ ސިޓީގައި އެ ސިޓީގެ އިރުމަތީގައި އޮންނަ އަލްސަލާމް އަވަށަށް އަމާޒުކޮށް އިސްރާއީލުން ދިން ވައިގެ ހަމަލާއެއްގައި ފަލަސްތީނުގެ އާންމުންގެ ދެ މީހަކު ވަނީ ޝަހީދުވެފައެވެ.
މިދިޔަ އޮކްޓޫބަރު މަހު އިސްރާއީލުން ހަމަލާދޭން ފެށި ފަހުން ޣައްޒާގައި މަރުވި މީހުންގެ އަދަދު 34،596 އަށް އިތުރުވެފައިވާ ކަމަށް މެޑިކަލް އޮފިޝަލުން ވަނީ ބުނެފަ އެވެ.
ހަމަލާ ދޭން ފެށި ފަހުން ޒަހަމްވި މީހުންގެ އަދަދު 77،816 އަށް އަރާފައިވާއިރު، އެތައް ހާސް ބަޔަކު އަދިވެސް ވަނީ ކުނިތަކުގެ ދަށުގައި ތާށިވެފަ އެވެ.