މި ސަރުކާރަށް ވެރިކަން ލިބުން އެއީ ނަސީބު ކަމަށާއި، ވެރިކަމާއި ހަވާލުވެ ބަލާލިއިރު ގައުމު އޮތީ ބަނގުރޫޓު ކޮށްލާފައި ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާޙް ވިދާޅުވެއްޖެއެވެ.
ޕީއެންސީ ޖަގަހަ ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ފަލާހު ވިދާޅުވީ ކުރީ ސަރުކާރުން ވަނީ ދަރަނި ނަގަމުން ގޮސް ސަރުކާރުގެ ސްކޫލްތައް ވެސް މޯގޭޖުކޮށްފައި ކަމަށާއި ވެރިކަން ބަދަލުނުވިނަމަ، އާންމު ރައްޔިތުންގެ ސައިކަލުތައް ވެސް މޯގޭޖުކުރީސް ކަމަށެވެ.
އަދި 2018 އިން ފެށިގެން 2023 ވަނަ އަހަރާ ހަމައަށް އެމްޑީޕީން ވެރިކަން ކުރަމުން އައީ ރައްޔިތުންގެ މަޖިލީހުގެ ވަރަށް ސާފު އަޢުލަބިއްޔަތެއް ލިބިގެން ކަމަށާއި ނަމަވެސް އަޢުލަބިއްޔަތުގެ ބޭނުން ނަހަމަގޮތުގައި އެމްޑީޕީ ސަރުކާރުން ބޭނުން ކުރި ކަމަށް ފަލާހު ވިދާޅުވިއެވެ.
ރައްޔިތުންގެ މަޖިލީހުގެ ޤާނޫނުތަކާއި ޤަވައިދުތަކަށް އެމްޑީޕީން ގެނައި ބަދަލުތަކާއި އިސްލާޙުތަކަކީ ރާއްޖޭގެ ރައްޔިތުންނަށް އިޤްތިސާދީ ޒަހަރަކަށް ކަމަށާއި ރައްޔިތުން ބޮޑު އަދަވަޅަކަށް ވައްޓާލާ އެޖެންޑާ 19 އިން ރައްޔިތުންގެ ލޮލުގައި ރީތި އަދުނެއް އެޅުވިކަމަށް ވެސް ފަލާހު ވަނީ ވިދާޅުވެފައެވެ.
ފަލާހު ވިދާޅުވީ އެމްޑީޕީން ފަތުރާ ދޮގުތަކާ ކުރިމަތިލާނެ ހިތްވަރު މި ސަރުކާރުގެ ވެރިންގެ ކިބައިގައި ހުންނާނެކަމަށެވެ.