ވެލާނާ އިންޓަރނޭޝަނަލް އެއަރޕޯޓުގެ ވީއައިޕީ ލައުންޖުން ރައްޔިތުންގެ މަޖިލީހުގެ މެންބަރުންނާއެކު ފުރާވަޑައިގަންނަވާ ކޮންމެ މީހަކަށް އެ ޚިދުމަތް ލިބޭގޮތަށް އޮތްއޮތުން ބަދަލުކޮށް، ހަމައެކަނި މެންބަރުންނާއި އެބޭފުޅުން އާއިލާ މެންބަރުންނަށް ވީއައިޕީ ޚިދުމަތް ލިބޭގޮތަށް މަޖިލީހުގެ ޢާންމު ކޮމިޓީން ފާސްކޮށްފިއެވެ.
މީގެ ކުރީން އަމަލު ކުރަމުން އައިސްފައިވާ ގޮތުން، މަޖިލިސް މެންބަރާއި، އޭނާގެ އަނބިކަނބަލުން ނުވަތަ ފިރިކަލުންނާއި ދަރީންގެ އިތުރުން މައިންބަފައިންނަށް ވެސް ވީއައިއޭގެ ވީއައިޕީ ލައުންޖުން ޚިދުމަތްދެއެެވެ. އެ ޚިދުމަތަށްވާ ބިލު މަޖިލީހުން ދައްކަންޖެހޭއިރު، މިއީ ވަރަށް ކުރީއްސުރެން އަމަލު ކުރަމުން އައިސްފައިވާ އުސޫލެކެވެ.
ނަމަވެސް ނިމިދިޔަ 19 ވަނަ ރައްޔިތުންގެ މަޖިލީހުން ވަނީ އެ އުސޫލު ބަދަލުކޮށް، މަޖިލީހުގެ މެންބަރުންނާއެކު ފުރާވަޑައިގަންނަވާ އެހެން މީހުންނަށްވެސް ވީއައިޕީ ޚިދުމަތް ލިބޭގޮތަށް ނިންމާފައެވެ.
މިއަދު ބޭއްވި އާންމު ކޮމިޓީގައި އެ އުސޫލު ފާސްކުރީ 19ވަނަ މަޖިލީހުން އެ ގޮތަށް ފާސްކޮށްފައިވާތީއެވެ.
ނަމަވެސް އޭގެފަހުން މިރޭ ބޭއްވި ކޮމިޓީ ބައްދަލުވުމުގައި ވަނީ ރާއްޖޭގެ އިޤްތިޞާދީ ޙަލަތު މިހާރު ހުރިގޮތުން އަލުން އެ ނިންމެވުން މުރާޖާކުރުމަށް ނިންމާފައެވެ. އެގޮތުން ފޭދޫ ދެކުނު ދައިރާގެ މެންބަރު އިބްރާހީމް ދީދީ ހުށައެޅުއްވީ ވީއައިޕީގެ ޚިދުމަތް މެންބަރުންނާއި އެ މެންބަރުންގެ އާއިލާއަށް ޚިދުމަތްދޭ ގޮތް ހެދުމަށެވެ.
މަޖިލިސް މެންބަރުންނާ އެކު ފުރާ އެންމެނަށް ވީއައިއޭގެ ވީއައިޕީ ލައުންޖުން ޚިދުމަތް ދޭގޮތަށް 19ވަނަ މަޖިލީހުން ފާސްކުރީ މެންބަރުންނަށް ލިބިދޭ އިމްތިޔާޒުގެ ދަށުންނެވެ.
މިއަދު ނިންމި ނިންމުން ބާތިލުކޮށް، އެ މައްސަލަ ކޮމިޓީން ބޭރުކޮށްލައި، ކޮމިޓީން މިރޭ ފާސްކުރީ 2020ވަނަ އަހަރު އަމަލު ކުރަމުން އައި ގޮތަށް މެންބަރުންނާއި މެންބަރުންގެ އާއިލާއަށް އެކަނި ވީއައިޕީ ލައުންޖުން ޚިދުމަތް ލިބޭ ގޮތަށެވެ.