އެކްރެޑިޓޭޝަނާއި ހިލާފަށް ކްލިކް ކޮލެޖުން އޮންލައިން (އީ-ލަރނިންގ ޑެލިވަރީ މޮޑަލިޓީން) އަށް ކިޔަވައިދެމުންދާތީ، އެ ކޮލެޖަށް މޯލްޑިވްސް ކޮލިފިކޭޝަންސް އޮތޯރިޓީން ފިޔަވަޅު އަޅައިފި އެވެ.
މޯލްޑިވްސް ކޮލިފިކޭޝަންސް އޮތޯރިޓީން މިއަދު ކުރި އިއުލާނެއްގައި ވަނީ ކްލިކް ކޮލެޖަށް އީ-ލަރނިންގ ޑެލިވަރީ މޮޑަލިޓީގެ ދަށުން އެއްވެސް ޕްރޮގްރާމެއް ހިންގުމުގެ ހުއްދަ ދީފައިނުވާކަމަށް ބުނެފައެވެ.
އެހެންނަމަވެސް، ކޮވިޑް-19 އާ ގުޅިގެން، ދިވެހިރާއްޖޭގެ ހުރިހާ މަތީ ތަޢުލީމުދޭ މަރުކަޒުތަކަށް އީ-ލަރނިންގ ޑެލިވަރީ މޮޑަލިޓީގައި، އެ މަރުކަޒުތަކުން އެޕްރޫވް ކޮށްފައިވާ ޕްރޮގްރާމްތައް ހިންގުމުގެ އާއްމު ހުއްދައެއް އެ އޮތޯރިޓީ ދިން ކަމަށާއި، މި ހުއްދަ ކޮވިޑްގެ ސިއްހީ ނުރައްކަލުގެ ހާލަތު ނިމި އާންމު ހާލަތަށް ރުޖޫއަވުމުން، 28 އެޕްރީލް 2022 ގައި ބާޠިލުކުރިކަން ޢާއްމުކޮށް އަންގާ އިޢުލާންކުރި ކަމަށް ބުނެފައިވެއެވެ.
އެމްކިއުއޭ އިން ބުނިގޮތުގައި ކްލިކް ކޮލެޖުން ހިންގަމުން އަންނަ ‘ބެޗްލަރ އޮފް ބިޒްނަސް މެނޭޖްމަންޓް’ ޕްރޮގްރާމަކީ ‘ފޭސް-ޓު-ފޭސް’ ކޮށް ހިންގުމަށް އެކްރެޑިޓޭޝަން ދީފައިވާ ޕްރޮގްރާމަކަށް ވީނަމަވެސް، މި ޕްރޮގްރާމް އެ ކޮލެޖުން އިސްތިހާރުކޮށް ހިންގަމުން އަންނަނީ އީ-ލަރނިންގ ޑެލިވަރީ މޮޑަލިޓީންކަން އެ އޮތޯރިޓީއަށް ދަރިވަރުން ހުށަހަޅާފައިވާ ޝަކުވާތަކުން ފާހަގަކުރެވިފައިވާ ކަމަށެވެ.
އަދި މީގެއިތުރުން ފޭސް-ޓު-ފޭސް ކޮށް ހިންގުމަށް އެޕްރޫވަލް ދީފައިވާ އިތުރު ޕްރޮގްރާމްތައް އީ-ލަރނިންގ ޑެލިވަރީ މޮޑަލިޓީގެ ދަށުން ހިންގުމަށް އިސްތިހާރުކޮށްފައިވާކަން ކްލިކް ކޮލެޖްގެ އިންސްޓަގްރާމް ޕޭޖުންނާއި ކްލިކް ކޮލެޖްގެ ވެބްސައިޓުން އެ އޮތޯރިޓީއަށް އެނގިފައިވާ ކަމަށާއި، 18 ޖުލައި 2024 ވަނަ ދުވަހު ކޮލެޖުގެ އިސްވެރިންނާއެކު ބޭއްވުނު ބައްދަލުވުމުގައި އެކަން ކަށަވަރުވެފައި ވާކަމަށްވެސް އެމްކިއުއޭ އިން ބުނެފައިވެއެވެ.
އެހެންކަމުން އެމްކިއުއޭގެ ޕްރޮގްރާމް އެކްރެޑިޓޭޝަން ގަވާއިދާއި ޕްރޮގްރާމް އެކްރެޑިޓޭޝަން ގައިޑްލައިނާ ކްލިކް ކޮލެޖުން ޚިލާފްވުމާއި ގުޅިގެން އެ އޮތޯރިޓީން ވަނީ ކްލިކް ކޮލެޖް -/10,000 ރުފިޔާއިން ޖޫރިމަނާކޮށްފައެވެ. އަދި ރާއްޖޭގެ ޤައުމީ ސަނަދުތަކުގެ އޮނިގަނޑާ ޚިލާފަށް އަދި ޕްރޮގްރާމް އެކްރެޑިޓޭޝަނާ ޚިލާފަށް ހިންގާ ކަންކަން ރަނގަޅު ކުރުމަށް އަންގާ، ޕްރޮގްރާމް ހުއްޓުމަށް އެންގުމުގެ އިތުރުން، ސަނަދު ދިނުމުގެ ހުއްދަ ދޫނުކުރުމަށް އެ އޮތޯރިޓީން ވަނީ އަންގާފައެވެ.
އެމްކިއުއޭއިން ވަނީ މި ފިޔަވަޅުތަކާ ގުޅިގެން، އެކްރެޑިޓޭޝަން ހުއްދަ އާއި ނުލާ ހިންގާފައިވާ ޕްރޮގްރާމްތަކުގައި ކިޔަވާ ދަރިވަރުންނަށް ލިބޭ ގެއްލުމުގެ ޒިންމާ ކްލިކް ކޮލެޖުން އުފުލަންޖެހޭނެކަން ވެސް އަންގާފައެވެ.