ރާއްޖެއަށް ވަންނަ ބޭރު ފައިސާއާ ބެހޭ ގަވާއިދަކާއި ފައިސާ މާރުކުރުމުގެ ވިޔަފާރިއާ ބެހޭ ގަވާއިދުގެ މަގްސަދަކީ ރާއްޖޭގެ ބޭންކިން ނިޒާމުގެ ތެރެއަށް ވަންނަ ޑޮލަރުގެ އަދަދު އިތުރުކުރުން ކަމަށް ރުކަޒީ ބޭންކު، އެމްއެމްއޭގެ ގަވަރުނަރު އަޙުމަދު މުނައްވަރު ރޭ ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން، އެމްއެމްއޭގެ ގަވަރުނަރު ވިދާޅުވީ ޑިވެލޮޕްމެންޓް ބޭންކުގެ ލައިސަންސް ދިނުމަށް ބޭނުންވާ ދިރާސީ މަސައްކަތް ނިމި، އެމްއެމްއޭގެ ބޯޑުން ފާސްކޮށްފައިވާކަމަށެވެ. އެއާއެކު މި ހަފްތާ ތެރޭގައި ބޭންކް ލައިސަންސް ދެވި ވަރަށް އަވަހަށް މަސައްކަތް ފެށިގެންދާނެކަމަށް އުއްމީދު ކުރައްވާކަމަށް ގަވަރުނަރު ވިދާޅުވިއެވެ.
މީގެއިތުރުން ގަވަރުނަރު ވަނީ ރާއްޖޭގެ ނިޒާމު ފަރުމާކޮށްފައި އޮތް ގޮތުން ފަތުރުވެރިންނަށް ދިވެހި ރުފިޔާގެ ބޭނުން އެހާ ވަރަށް ނޯންނަކަން ފާހަގަ ކުރައްވައިފައެވެ. އެހެން ނަމަވެސް އެއީ އެހެން ގައުމުތަކުގައި ކަންހިނގަމުން އަންނަ ގޮތް ނޫން ކަމަށް ގަވަނަރުނަރު ވިދާޅުވިއެވެ.
އެމްއެމްއޭއިން އާންމުކުރި ގަވާއިދުގެ ދަށުން، ފަތުރުވެރިކަމުގެ ސިނާއަތުގައި ހަރަކާތްތެރިވާ ވިޔަފާރިތަކަށް ރާއްޖޭގެ ބޭންކިން ނިޒާމުގެ ތެރެއިން ބޭރު ފައިސާ މާރުކުރަން މާޖުބޫރުވާނެއެވެ. އެގޮތުން، ފަތުރުވެރިކަމުގެ ދާއިރާގައި ޚިދުމަތްދޭ ފަރާތްތަކުން ކޮންމެ މަހެއްގައި ފޯރުކޮށްދޭ ޚިދުމަތުގެ ތަފްސީލު ޖެހިގެން އަންނަ މަހުގެ 28ގެ ކުރިން އެމްއެމްއޭއަށް ހުށަހަޅަންޖެއެއެވެ. އަދި ތިން މަސްދުވަހުގެ ތެރޭގައި އެ ފައިސާ ރާއްޖޭގެ ބޭންކަކަށް ޖަމާކުރަން އެ ގަވާއިދުން ވަނީ ލާޒިމުކޮށްފައެވެ.