ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ރާއްޖޭގައި ރާޅުތަކުގެ ބާރު ބޭނުންކޮށްގެން އިޔާދަކުރަނިވި ހަކަތަ އުފެއްދުމުގެ މަޝްރޫޢެއް ފަށައިފިއެވެ.
މި މަޝްރޫޢުގެ ދަށުން ރާއްޖޭގެ ފަޅުތަކުގެ ރާޅުތައް މޮނިޓަރކުރުމުގެ ޓެކްނޮލޮޖީ ބޭނުންކުރަން ފަށާފައިވާކަމަށް ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ މިއަދު އެކްސްގައި ވަނީ ވިދާޅުވެފައެވެ.
ސްޓެލްކޯގެ މި މަޝްރޫޢަކީ ރާއްޖޭގައި އިޔާދަކުރަނިވި ހަކަތައިގެ މިންވަރު 33 އިންސައްތައަށް އިތުރުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދު ފުއްދުމަށް އެޅޭ މުހިންމު ފިޔަވަޅެއްކަމަށް ފަހުމީ ވިދާޅުވިއެވެ. އަދި މި މަޝްރޫޢުގެ ދަށުން ރާއްޖޭގައި ރާޅުތަކުން ހަކަތަ އުފެއްދުމުގެ ފުރުޞަތު އޮތް މިންވަރު ދެނެގަތުމަށް ގިނަ މަޢުލޫމާތު އެއްކުރެވި، ދިރާސާކުރެވޭނެ ކަމަށްވެސް އޭނާ ވިދާޅުވިއެވެ.
ރާޅުތަކުން ހަކަތަ އުފެއްދުމަކީ އިރުގެ އަލިން ހަކަތަ އުފެއްދުމާ ޚިލާފަށް މޫސުމުގެ ބަދަލުތަކުގެ ސަބަބުން ކުރާ އަސަރު ކުޑަ، އެއްވަރެއްގައި ދެމެހެއްޓެނިވި ގޮތެއްގައި ހަކަތަ އުފެއްދޭނެ ވަސީލަތެއްކަމަށް ފަހުމީ ފާހަގަކުރެއްވިއެވެ. އަދި މި ދިރާސާގެ ނަތީޖާއަށް ބަލައި، ރާޅުތަކުން އުފައްދާ ހަކަތަ މިހާރު ބޭނުންކުރަމުންދާ އިޔާދަކުރަނިވި ހަކަތައިގެ ވަސީލަތްތަކާ އެކުގައި ބޭނުންކުރެވޭނެ މިންވަރު ދެނެގަނެވޭނެ ކަމަށްވެސް އޭނާ ވިދާޅުވިއެވެ.
މި މަޝްރޫޢަކީ ސާފު އަދި ދެމެހެއްޓެނިވި މުސްތަޤުބަލަކަށް ދިވެހިރާއްޖެއިން ކުރަމުންދާ މަސައްކަތާ އެއްގޮތަށް ޤައުމުގެ އިޔާދަކުރަނިވި ހަކަތައިގެ ލަނޑުދަނޑިތައް ޙާޞިލްކުރުމަށް ކުރެވޭ މުހިންމު މަސައްކަތެއްކަމަށް ފަހުމީ ވިދާޅުވިއެވެ.