ރައީސް ޑރ. މުޙައްމަދު މުޢިއްޒުގެ ސަރުކާރަށް އަހަރު ފުރުނު ދުވަހަކީ ހަމައެކަނި ސަރުކާރަށް އަހަރު ފުރުނު ދުވަހެއް ނޫން ކަމަށާއި، މިއީ ރައްޔިތުންގެ އުއްމީދުތަކާއި އާ ކާމިޔާބީތަކުގެ ފެށުމުގެ އަހަރު ފުރުން ކަމަށް ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި، ފަހުމީ ވިދާޅުވީ ރައީސް މުޢިއްޒު ވެރިކަމާ ހަވާލުވެވަޑައިގަތީ ޤައުމާއި ރައްޔިތުންގެ ޙައްޤުގައި ކުރައްވަންޖެހޭ ކޮންމެ ކަމެއް ފަސްޖެހިވަޑައިނުގެން ކުރައްވާނެކަމުގެ ޔަޤީންކަން ދެއްވަމުން ކަމަށެވެ. އަދި އެ ދުވަހު ކުރެއްވި ހުވަޔާއި ދެއްވި ޔަޤީންކަމާ އެއްގޮތަށް، އެތެރެއާއި ބޭރުގެ ނުފޫޒުތަކަށް ބެއްލެވުމެއްނެތި، ދިވެހިރާއްޖެއަކީ އަރަނިވެރި،ަނިވެރި، ތިޔާގި އަދި މާލީ ބުރަތަކަށް ވިލުންވެރި ޤައުމަކަށް ހެއްދެވުމަށް ރައީސް އަޅުއްވަމުން ގެންދަވާ ހިތްވަރުގަދަ ފިޔަވަޅުތަކުން އެކަނިވެސް، ޤައުމާއި ރައްޔިތުންދެކެ އެމަނިކުފާނުގެ ހިތްޕުޅުގައި އޮތް ލޯބި ހާމަވެގެންދާ ކަމަށް ފަހުމީ ވިދާޅުވިއެވެ.
ފަހުމީ އިތުރަށް ފާހަގަކުރެއްވި ގޮތުގައި، ޞިއްޙީގޮތުން ދުޅަހެޔޮ މުޖުތަމަޢުއެއް ބިނާކުރުމަށް ނިންމަވަންޖެހޭ ނިންމެވުންތައް ނިންމަވައި، އެކަންކަން ތަންފީޛު ކުރައްވަމުން ގެންދަވާ ހަލުވިކަމާއި، ރައްޔިތުންގެ ލާބަޔާއި މަންފާއަށް ނިންމަވަންޖެހޭ ކޮންމެ ނިންމެވުމެއް އޭގެ އެންމެ ފުރިހަމަ ގޮތުގައި ނިންމަވައި، ތަންފީޛުކުރެއްވުމުގައި ގެންގުޅުއްވާ ހަރުދަނާ ސިޔާސަތުތަކާމެދު، ދިވެހި ޤައުމު ދެކެ ލޯބިވާ ރައްޔިތެއްގެ ހައިސިއްޔަތުން އެމަނިކުފާނު ފަޚުރުވެރިވާ ކަމަށެވެ.
“މި ސަރުކާރަކީ ކޮންމެ ދަތި ދަނޑިވަޅެއްގައިވެސް ރައްޔިތުންގެ އަޑުއަހައި، އެ ރައްޔިތުންގެ ބޭނުންތަކަށް އިޖާބަދިނުމުގައި ފަސްޖެހިލުމެއް ނެތި މަސައްކަތް ކުރަންކެރޭ އަދި ރައްޔިތުންގެ ޙައްޤުގައި ވަކާލާތުކޮށް، ޤައުމުގެ މަސްލަހަތު ދިފާއުކުރުމުގައި ހަރުދަނާ ފިޔަވަޅުތައް އަޅަމުންދާ ސަރުކާރެއް،” ފަހުމީ ވިދާޅުވިއެވެ.
ނިންމާލަމުން ފަހުމީ ވިދާޅުވީ، މާތްﷲގެ ވާގިފުޅާއެކު، ކުރިއަށް އޮތް ހަތަރު އަހަރަކީވެސް ޤައުމީ ތަރައްޤީގެ ދަތުރުގައި އިތުރު ކާމިޔާބީތައް ޙާޞިލްކުރެއްވޭނެ އަދި ރައްޔިތުންގެ ލާބައާއި މަންފާއަށް މަސައްކަތް ކުރެވޭ، ގައުމު އިތުރަށް ކުރިއަރާ ދިއުމުގެ ހެޔޮ ނަތީޖާ ފެންނާނެ އަހަރުތަކަކަށް ވެގެންދާނެ ކަމުގެ އުއްމީދު އޮތް ކަމަށެވެ.
ރައީސް މުޢިއްޒުގެ ސަރުކާރުން ވޭތުވެދިޔަ އަހަރު ތެރޭގައި ޤައުމަށް ގެނެސްދީފައިވާ ކުރިއެރުންތަކަށްޓަކައި ފަހުމީ ވަނީ ރައީސަށް ޝުކުރު ދަންނަވާފައެވެ. އަދި މި ސަރުކާރުން ދިވެހި ރައްޔިތުންނަށް ދައްކާފައިވަނީ އޯގާތެރިކަމާއި ހިތްވަރުގަދަކަމުގެ ނަމޫނާ ކަމަށް ފަހުމީ ފާހަގަކުރެއްވިއެވެ.
ފަހުމީ މިހެން ވިދާޅުވެފައިވަނީ ރައީސް މުޙައްމަދު މުޢިއްޒުގެ ސަރުކާރަށް އަހަރު ފުރުނު ދުވަހާ ގުޅިގެންނެވެ. ރައީސް މުޢިއްޒު ވެރިކަމާ ހަވާލުވެވަޑައިގަތީ 2023 ވަނަ އަހަރުގެ ނޮވެމްބަރު 17 ވަނަ ދުވަހުއެވެ. އެ ދުވަހުން ފެށިގެން މިހާތަނަށް ސަރުކާރުން ވަނީ އިޤްތިޞާދީ، އިޖްތިމާޢީ އަދި ސިޔާސީ ގިނަ ކަންކަން ކުރިއަށް ގެންގޮސްފައެވެ.