މަސްމާރުކޭޓް ސަރަހައްދުގައި ޤަވާއިދާ ޚިލާފަށް ވިޔަފާރިކުރަމުންދިޔަ 39 ބިދޭސީން ހިފަހައްޓައިފިއެވެ. މިކަން ހާމަަކުރެއްވީ އިމިގްރޭޝަންގެ ކޮންޓްރޯލަރ ޖެނެރަލް މުހައްމަދު ޝަމްއާން ވަހީދު “އެކްސް”ގައި ކުރެއްވި ޕޯސްޓެއްގައެވެ.
ޝަމްއާން ވިދާޅުވި ގޮތުގައި، މަސްމާރުކޭޓް ސަރަހައްދުގައި ބިދޭސީން ވިޔަފާރިކޮށް، މަސްބޯޓުތައް ކޮންޓްރޯލްކުރަމުންދާތީ ގިނަ ބަޔަކު ކަންބޮޑުވުން ފާޅުކޮށްފައިވާތީ، ޓާސްކް ފޯހުން މިއަދު އެ ސަރަހައްދުގައި އަޅާފައިވާ މަސްބޯޓުތައް ބަލައި ފާސްކޮށްފައިވެއެވެ. މި އޮޕަރޭޝަންގައި ޤަވާއިދާ ޚިލާފަށް އުޅުނު 39 ބިދޭސީން ވަނީ އިމިގްރޭޝަންގެ ބަންދަށް ގެންގޮސްފައެވެ.
މަސްމާރުކޭޓް ސަރަހައްދާއި ލޯކަލް މާރުކޭޓް ސަރަހައްދަކީ ބިދޭސީން އެންމެ ގިނަ ސަރަހައްދެވެ. ކުރީގެ ސަރުކާރުތަކުން މި ސަރަހައްދުގައި ބިދޭސީން ކުރާ ވިޔަފާރިތައް ހުއްޓުވަން މަސައްކަތްކުރި ނަމަވެސް، އެކަން ކާމިޔާބުވެފައެއް ނުވެއެވެ.
އެހެންނަމަވެސް، މިހާރުގެ ސަރުކާރުން ވެރިކަމާ ހަވާލުވުމަށްފަހު، ޤަވާއިދާ ޚިލާފަށް ވިޔަފާރިކުރާ ބިދޭސީން ހޯދުމަށް ވަރަށް ފުޅާ ދާއިރާއެއްގައި އޮޕަރޭޝަންތައް ކުރިއަށްގެންދާކަން ފާހަގަކުރެވެއެވެ. މިއަދުގެ އޮޕަރޭޝަނަކީވެސް މި މަސައްކަތުގެ ތެރެއިން ކުރެވުނު އޮޕަރޭޝަނެކެވެ.