އިންތިޚާބުވެފައިވާ މެމްބަރުން ދައުރުގެ ތެރޭގައި ޕާޓީ ބަދަލުކުރުމަކީ އާންމުންގެ އިތުބާރު ގެއްލި، ވެރިކަން ހިންގުމަށް ބުރޫއަރައި އަދި އާންމު އަޚްލާޤާއި ޚިލާފު ގޯސް ކަންތައްތަކަށް މަގުފަހިކޮށްދޭނެ ކަމެއް ކަމަށް ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ފަހުމީ ވަނީ ރައްޔިތުންގެ މަޖިލީހުގެ މެންބަރުންނަށް ޕާޓީ ބަދަލު ނުކުރެވޭގޮތަށް ޤާނޫނު އަސާސީއަށް އިސްލާޙެއް ހުށަހެޅުއްވިކަމަށްޓަކާ ސަރުކާރަށް ޝުކުރު އަދާކުރައްވާފައެވެ.
ފަހުމީ ވިދާޅުވީ މިއީ ޑިމޮކްރަސީ ހަރުދަނާކޮށް، މިހާރު އަމަލުކުރަމުންދާ އެންޓި ޑިފެކްޝަން ޤާނޫނު އިތުރަށް ފުރިހަމަކޮށް، ޖަވާބުދާރީވުމާއި ހާމަކަން ބޮޑު ގޮތެއްގައި ކަންކަން ކުރިއަށް ގެންދިއުމަށް އެޅުނު ތަޢުރީފު ޙައްޤު ފިޔަވަޅެއް ކަމަށެވެ. އަދި އިނގިރޭސިވިލާތާއި އެމެރިކާ ފަދަ ތަރައްޤީވެފައިވާ ޤައުމުތަކުގައި ޤާއިމުވެފައިވާ ނިޒާމުތަކުން ފިލާވަޅު ލިބިގަނެ، މި ހުށަހެޅިފައިވާ އިސްލާޙަށް އިސްކަންދެއްވައި، މި އިސްލާޙު އަވަހަށް ފާސްކުރުމަށް ހުރިހާ މަޖިލިސް މެމްބަރުންނަށް ގޮވާލައްވާފައިވެއެވެ.
ފަހުމީ ދެކެވަޑައިގަންނަވާ ގޮތުގައި މި އިސްލާޙަކީ ކޮރަޕްޝަނުން އެއްކިބާވެފައިވާ ޑިމޮކްރަސީއެއް އުފެއްދުމަށާއި ސިޔާސީ ހަމަޖެހުން އިތުރުކުރުމަށާއި ޝަރުޢީ ދާއިރާގެ މިނިވަންކަން ވަރުގަދަކުރުމަށް ބާރު އަޅާނެ މުހިއްމު ބަދަލެކެވެ. އޭނާ ވިދާޅުވީ މި އިސްލާޙުގެ ސަބަބުން، ރައްޔިތުންގެ މަޖިލީހުގެ މެންބަރުން އެމީހުންގެ މެންޑޭޓާއި، އެމީހުން ޚިދުމަތްކުރާ ރައްޔިތުންނަށް ވަޢުދުވީ ކަންކަން ކުރުމުގައި ދެމި ތިބޭނެކަން ކަށަވަރުކޮށްދީ، ސިޔާސީ މާޙައުލު ހަމަޖައްސައިދޭނެ ކަމަށެވެ.
މީގެ އިތުރުން ފަހުމީ ފާހަގަކުރެއްވި ގޮތުގައި މި އިސްލާޙުގެ ސަބަބުން ޝަރުޢީ ދާއިރާގެ މިނިވަންކަން ވަރަށް ބޮޑަށް ކަށަވަރުކުރެވިގެންދާނެއެވެ. އަދި މިއީ ރާއްޖޭގެ ޑިމޮކްރެޓިކް އޮނިގަނޑު ހަރުދަނާކޮށް، ސިޔާސީ މުއައްސަސާތަކުގެ ނަޒާޙަތްތެރިކަން ރައްކާތެރިކުރުމަށް ލިބުނު ތާރީޚީ ފުރުޞަތެއް ކަމަށް ވިދާޅުވެފައިވެއެވެ.
އަދި ޤައުމަށް އުޖާލާ، ޒިންމާދާރު އަދި ނަޒާޙަތްތެރި މާދަމާއެއް ހޯދުމަށް މި ފުރުޞަތުގެ ބޭނުން ހިފުމަށް ފަހުމީ ވަނީ އެދިވަޑައިގެންފައެވެ.
މި އިސްލާޙަކީ މިހާރު އަމަލުކުރަމުންދާ އެންޓި ޑިފެކްޝަން ޤާނޫނު އިތުރަށް ފުރިހަމަކުރުމަށް ހުށަހެޅިފައިވާ އިސްލާޙެކެވެ. މި އިސްލާޙު ފާސްވެއްޖެނަމަ، ރައްޔިތުންގެ މަޖިލީހުގެ މެންބަރުންނަށް އެމީހުންގެ ދައުރުގެ ތެރޭގައި ޕާޓީ ބަދަލުކުރުމުގެ ފުރުޞަތު ގެއްލިގެންދާނެއެވެ.
ފަހުމީ ފާހަގަކުރެއްވި ގޮތުގައި، މި އިސްލާޙަކީ އިނގިރޭސިވިލާތާއި އެމެރިކާ ފަދަ ތަރައްޤީވެފައިވާ ޤައުމުތަކުގައި ޤާއިމުވެފައިވާ ނިޒާމުތަކުން ފިލާވަޅު ލިބިގަނެ ހުށަހެޅިފައިވާ އިސްލާޙެކެވެ. އޭނާ ވިދާޅުވީ އެހެން ޤައުމުތަކުގައި ހަދާފައިވާ މިފަދަ ޤާނޫނުތަކަކީވެސް ޒިންމާދާރު، ދެމެހެއްޓެނިވި، ހަމަޖެހޭ ޑިމޮކްރަސީއެއް ހިންގުމުގައި މުހިއްމު ދައުރެއް އަދާކުރާ އެއްޗެއްކަން ވަރަށް ހަމަކޮށް ދަނީ ފެންނަމުން ކަމަށެވެ.