ޕީޕަލްސް ނޭޝަނަލް ކޮންގްރެސް (ޕީއެންސީ) އިން އެ ޕާޓީގެ އެތެރޭގެ އިންތިޚާބު މި މަހުގެ 23 ވަނަ ދުވަހު ބޭއްވުމަށް ނިންމައިފިއެވެ. މި އިންތިޚާބުގައި ޕާޓީގެ 59 އެތެރޭގެ ދާއިރާއަކަށް މެންބަރުން އިންތިޚާބުކުރެވޭނެ ކަމަށް ޕާޓީން ބުނެފައިވެއެވެ.
ޕީއެންސީން ޝާއިޢުކޮށްފައިވާ ކެންޑިޑޭޓުންގެ ލިސްޓުން ދައްކާގޮތުގައި، ޖުމްލަ 91 ދާއިރާގެ ތެރެއިން 32 ދާއިރާއެއްގެ މަޤާމުތަކަށް މެންބަރުން ވަނީ އިންތިޚާބަކާ ނުލައި ހޮވިފައެވެ. މީގެ ތެރޭގައި ކުޅުދުއްފުށީގެ ހުރިހާ ދާއިރާއެއްގެ ކެންޑިޑޭޓުންވެސް ހިމެނެއެވެ.
ހޮނިހިރު ދުވަހު ބާއްވާ މި އިންތިޚާބުގައި ވާދަކުރެވޭ މަޤާމުތަކުގެ ތެރޭގައި ދާއިރާގެ ރައީސާއި ނައިބު ރައީސްގެ އިތުރުން، ރަށްރަށުގެ ނުވަތަ އެއް ރަށް ނުވަތަ އަވަށެއް ހިމެނޭ ދާއިރާތަކުގެ ޒުވާނުންގެ ރައީސް، އަންހެނުންގެ ރައީސް، ޒުވާން މެންބަރު އަދި އާންމު ފަސް މެންބަރުން ހިމެނެއެވެ.
ޕީއެންސީން މި އިންތިޚާބު ބޭއްވުމަށް ފުރަތަމަ ނިންމާފައިވަނީ މިދިޔަ މަހުގެ 19 ވަނަ ދުވަހުގައެވެ. ނަމަވެސް އެކި ސަބަބުތަކާއި ހުރެ މި ތާރީޚު ވަނީ ދެފަހަރެއްގެ މަތިން ފަސްކޮށްފައެވެ.
ޕާޓީން ބުނެފައިވާ ގޮތުގައި މި އިންތިޚާބުގެ ސަބަބުން ޖުމްލަ 2,095 މެންބަރުން އެ ޕާޓީގެ އެކި މަޤާމުތަކަށް އައްޔަންކުރެވޭނެއެވެ.