ޝަރުއީ ކޯޓުތަކާއި އިދާރާތަކުގައި މަސައްކަތްކުރާ މުވައްޒަފުންނަށް މޫނު ބުރުގާ އަޅައިގެން މަސައްކަތްކުރެވޭނެ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ނިންމައިފި އެވެ. ޑީޖޭއޭ އިން އާންމުކުރި ސާކިއުލާގައި ބުނެފައިވަނީ ޝަރުއީ ދާއިރާގެ މުވައްޒަފުންގެ ގަވާއިދުގައި ހެދުން އެޅުމާ ގުޅޭ ގޮތުން އޮތް މާއްދާ އިސްލާހުކޮށް އަލުން އެކުލަވާލާފައިވާ ކަމަށެވެ.
މީގެ ކުރިން އެ މާއްދާގައި އޮތީ، ޝަރުއީ ދާއިރާގެ ކޮންމެ ޚިދުމަތަކީ ވެސް ޒިންމާދާރުކަމާއެކު ދޭންޖެހޭ އަދި ޖަވާބުދާރީވާންޖެހޭ ޚިދުމަތަކަށް ވެފައި، ޚިދުމަތް ލިބިގަންނަން އަންނަ ފަރާތްތަކަށް މުއާމަލާތްކުރާ މުވައްޒަފަކީ ކާކުކަން އެނގެން ޖެހޭނެ ކަމަށެވެ. ނަމަވެސް އަލަށް ގެނެވުނު އިސްލާހުގައި ބަޔާންކޮށްފައިވާ ގޮތުން، މަސައްކަތުގެ މާހައުލުގައި އުޅޭއިރު މުވައްޒަފަކީ ކާކުކަން ކަށަވަރުކުރަން ޖެހިއްޖެ ހާލަތެއްގައި، އެ މުވައްޒަފެއްގެ މޫނު ކޯޓު ނުވަތަ އިދާރާގެ ކަމާ ބެހޭ އަންހެން މުވައްޒަފަކަށް ދައްކަންވާނެ އެވެ.
މި އިސްލާހާ އެކު މުވައްޒަފުންނަށް މޫނު ބުރުގާ އެޅުމަށް އެއްވެސް ހުރަހެއް ނެތްކަން ސާފުކޮށް ބަޔާންކޮށްފައިވާއިރު، މިއީ ޝަރުއީ ދާއިރާގައި މަސައްކަތްކުރާ އަންހެން މުވައްޒަފުންގެ ދީނީ މިނިވަންކަމަށް އިތުރު ފުރުސަތުތަކެއް ހުޅުވިގެންދާނެ ބަދަލެއް ކަމަށް ބެލެވެ އެވެ.