ރައްޔިތުންނަށް ދީނީ ޚިދުމަތްތައް ފުޅާކޮށް، ދަތިތައް ހައްލުކުރުމުގެ ގޮތުން، ކ. ދިއްފުށި، އއ. ރަސްދޫ އަދި ލ. ދަނބިދޫގައި 500 މީހުންގެ ޖާގައިގެ ތިން މިސްކިތެއް އިމާރާތް ކުރުމުގެ މަސައްކަތް، އެސް.އޭ.އެސް އީ ކޮންސްޓްރަކްޝަން ޕްރައިވެޓް ލިމިޓެޑާއި މިއަދު ހަވާލުކޮށްފިއެވެ. މި މަޝްރޫޢުތައް ކުރިއަށް ގެންދިއުމަށް ހަމަޖެހިފައިވަނީ ކޮންޓްރެކްޓަރ ފައިނޭންސް އުސޫލުންނެވެ.
މި މަޝްރޫޢުގެ އެއްބަސްވުމުގައި ސޮއިކުރުމަށް ބޭއްވި ޚާއްޞަ ރަސްމިއްޔާތުގައި ރައީސް ޑރ. މުޙައްމަދު މުޢިއްޒު ބައިވެރިވެވަޑައިގެންނެވިއެވެ. މީގެ އިތުރުން، އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދާއި، ދަޢުލަތުގެ ވަޒީރުންނާއި ރައްޔިތުންގެ މަޖިލީހުގެ މެމްބަރުންވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ. މި ރަސްމިއްޔާތަކީ ރައްޔިތުންނާ ގުޅުންހުރި ތަރައްޤީގެ ބައެއް މަޝްރޫޢުތައް ޕްރައިވެޓް ކޮންޓްރެކްޓަރުންނާއެކު ސޮއިކުރުމަށް ބޭއްވި ރަސްމިއްޔާތެކެވެ.
މި އެއްބަސްވުމުގައި އިސްލާމީކަންތައްތަކާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ ޢަބްދުﷲ ސަޢުދާންއެވެ. އަދި އެސް.އޭ.އެސް އީ ކޮންސްޓްރަކްޝަން ޕްރައިވެޓް ލިމިޓެޑުގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަބްދުﷲ ސަވާދުއެވެ.
އިސްލާމީކަންތައްތަކާ ބެހޭ ވުޒާރާއިން ހާމަކުރިގޮތުގައި މި ތިން ރަށުގައި އިމާރާތްކުރާ މިސްކިތްތަކަކީ ޒަމާނީ ފެންވަރުގެ ޚިދުމަތްތައް ލިބޭނެ ގޮތަށް ފަރުމާކުރެވިފައިވާ ތަންތަނެވެ. މިގޮތުން، މިސްކިތުގައި ކުލާސްރޫމާއި ލައިބްރަރީގެ އިތުރުން، އަންހެނުންނާއި ފިރިހެނުންނަށް ވަކި ވުޟޫ ކުރާ ބަޔާއި ހިނަވާގެ ޤާއިމް ކުރުމަށް ހަމަޖެހިފައިވާއިރު، މީގެ އިތުރުން، ތިމާވެއްޓާ ރައްޓެހި ގޮތެއްގައި ހަކަތަ އުފެއްދުމަށްޓަކައި، މި މިސްކިތްތަކުގައި ސޯލާ ނިޒާމުވެސް ޤާއިމްކުރެވޭނެކަމަށް އެ ވުޒާރާއިން ބުނެއެވެ.
މި މަޝްރޫޢުތަކަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުގެ ދަށުން ކުރިއަށްދާ މުހިއްމު މަޝްރޫޢުތަކެކެވެ. އިސްލާމީ ދާއިރާއިން މި ސަރުކާރުގެ ދައުރުގެ ތެރޭގައި ގިނަ މަސައްކަތްތަކެއް ކުރިއަށް ގެންދިއުމަށް މިހާރު އެކި ކުންފުނިތަކާއި ވަނީ ހަވާލުކޮށްފައެވެ.