މާލެ ސަރަޙައްދުގައި ކުރިއަށްގެންދާ ބިންހިއްކުމުގެ މަޝްރޫޢުތަކުގެ މަސައްކަތް އަވަސްކުރުމަށް ސަރުކާރުން ނިންމައިގެން ރާއްޖެ ގެނައުމަށް ހަމަޖެހިފައިވާ ޑްރެޖަރު މިހާރު ރާއްޖެއަށް އައިސްފައިވާކަމަށް ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައެވެ. އެމަނިކުފާނު ވިދާޅުވީ ހުޅުމާލޭ 3 ވަނަ ފިޔަވަހީގައި ބިން ހިއްކުމުގެ މަސައްކަތް ކުރުމަށްޓަކައި ނެދަލޭންޑުގެ ބޮސްކާލިސްގެ ޓްރެއިން ސަކްޝަން ހޮޕަރ ޑްރެޖަރ، ޕްރިންސް ޑާ ނެޑަލަންޑަން ރާއްޖެ އައިސްފައިވާކަމަށެވެ. މި ޑްރެޖަރު ބޭނުންކޮށްގެން އެސަރަޙައްދު ހިއްކުމުގެ މަސައްކަތް މިއަދު ފެށުމަށް ވަނީ ހަމަޖެހިފައެވެ.
މި ޑްރެޖަރު ރާއްޖެ އައުމާއެކު، މިހާރުވެސް އެސަރަޙައްދު ހިއްކަމުން އަންނަ ޓްރެއިން ސަކްޝަން ހޮޕަރ ޑްރެޖަރ އޮރަންޖީއާއެކު މަސައްކަތްތައް އިތުރަށް އަވަސްވެގެންދާނެކަން ރައީސް މުޢިއްޒު ފާހަގަކުރެއްވިއެވެ. ހުޅުމާލޭ 3 ވަނަ ފިޔަވަހީގެ ބިން ހިއްކުމުގެ މަސައްކަތް ޑިސެންބަރު މަހުގެ ނިޔަލަށް ނިންމާލެވޭނެކަމަށް ލަފާކުރައްވާކަމަށްވެސް ރައީސް ވަނީ ވިދާޅުވެފައެވެ. މިއީ މާލެ ސަރަޙައްދުގެ ބޯހިޔާވަހިކަމުގެ ދަތިކަން ހައްލުކުރުމަށް ސަރުކާރުން ކުރިއަށްގެންދާ މުހިންމު މަޝްރޫޢެކެވެ.
މާލެ ސަރަޙައްދުގައި ބިން ހިއްކުމަށް ކުރިއަށްގެންދާ އިތުރު މަޝްރޫޢުތަކަށް އަލިއަޅުއްވާލައްވަމުން ރައީސް ވިދާޅުވީ، ގިރާވަރުފަޅު ހިއްކުމުގެ މަސައްކަތްވެސް ވަރަށް އަވަހަށް ފެށޭނެކަމަށެވެ. އެގޮތުން މިހާރު އީއައިއޭ (އެންވަޔަރަންމަންޓަލް އިމްޕެކްޓް އެސެސްމަންޓް) ގެ މަސައްކަތް ކުރިއަށްދާކަމަށާއި، އިދާރީގޮތުން ކުރަންޖެހޭ މަސައްކަތްތައް ނިމުމުން ބިން ހިއްކުމުގެ މަސައްކަތް ފެށޭނެކަމަށް އެމަނިކުފާނު ވިދާޅުވިއެވެ. ހުޅުމާލޭ 3 ވަނަ ފިޔަވަހީގެ މަސައްކަތް ނިމުމާއެކު ގިރާވަރުފަޅު ހިއްކުމުގެ މަސައްކަތްތައް ފެށޭނެކަމަށް ރައީސް ވިދާޅުވިއެވެ.
ރާއްޖޭގެ އެކި ސަރަޙައްދުތަކުގައި ކުރިއަށްގެންދާ ބިންހިއްކުމުގެ މަސައްކަތްތައް އަވަސްކުރުމަށް އިތުރު ޑްރެޖަރުތައް ގެންނަވާނެކަމަށް ރައީސް މީގެކުރިންވެސް ވަނީ ވިދާޅުވެފައެވެ. މިގޮތުން އެމްއޭސީއެލް (މޯލްޑިވްސް އެއަރޕޯޓްސް ކޮމްޕެނީ ލިމިޓެޑް) އާއި ހަވާލުކޮށްގެން 3 ޑްރެޖަރު ގެނައުމުގެ މަސައްކަތް ފަށްޓަވާފައިވާކަން ރައީސްވަނީ ހާމަކުރައްވާފައެވެ.



