އަލްމަދަރުސަތުލް އަރަބިއްޔަތުލް އިސްލާމިއްޔާ ކުރިން ހިންގި އިމާރާތް ތަޅައިލުމުގެ މަސައްކަތް ލޯކަލް ގަވަނަންސް މިނިސްޓްރީން މިއަދު ފަށައިފިއެވެ.
މި އިމާރާތް ތަޅައިލައި އެ ތަނުގައި ޕާކިން ޒޯނަކާއި، ކޮމިއުނިޓީ ޕާކެއް ތަރައްޤީކުރުމުގެ ވިސްނުންފުޅު ގެންގުޅުއްވާކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހާމަކުރެއްވީ ނޮވެމްބަރު 25 ވަނަ ދުވަހު މައްޗަންގޮޅި ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
އެގާރަ ހާސް އަކަފޫޓުގެ އެ ބިމުގައި ހުރި އެ އިމާރާތް ތަޅައިލަން ނިންމީ، އެ އިމާރާތަކީ މީހުން ބޭނުންކުރުން ރައްކާތެރި ހާލަތެއްގައި ހުރިތަނެއް ނޫން ކަމަށް ވާތީއެވެ.
މި މަސައްކަތް މިއަދު ހެނދުނު ފަށާފައިވާއިރު، މަސައްކަތް ކުރިއަށްދާ ގޮތް ބައްލަވާލެއްވުމަށްޓަކައި މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު އުމަރު ވަނީ ޒިޔާތަރްކުރައްވާފަ އެވެ.
ރައީސް މުއިއްޒު ވިދާޅުވި ގޮތުގައި އެ ބިމުގައި ޕާކު ހަދާނީ، ސުކޫލުތަކަށް އަންނަ ކުދިންނާއި ބެލެނިވެރިންނަށް މަޑުކޮށްލެވޭ ގޮތަށެވެ. އެ މަނިކުފާނު ވިދާޅުވީ، ބޭނުންފުޅު ވަނީ ވަރަށް ބާރު ސްޕީޑުގައި އެ މަޝްރޫއު ކުރިއަށް ގެންގޮސް، އަންނަ ފެބްރުވަރީ މަހު ފެށޭ ރޯދަމަހުގެ ކުރިން ނިންމަން ކަމަށެވެ.



