ރާއްޖޭގެ އަތޮޅުތައް ހައި ސްޕީޑް ފެރީ ވިއުގަ އަކުން ގުޅާލުމަށް ފަރުމާކޮށްފައިވާ “އިންޓަރގްރޭޓެޑް ނެޝެނަލް ޕަބްލިކް ފެރީ ނެޓްވޯރކް” (އާރުޓީއެލް) މަޝްރޫއުގެ ދަށުން، ނ. އަތޮޅާއި ރ. އަތޮޅާ ދެމެދު ފެރީގެ ހިދުމަތް އަންނަ އާދީއްތަ ދުވަހުން ފެށިގެން ދޭން ތައްޔާރުވެއްޖެއެވެ.
މި ހިދުމަތް ފެށުމާއެކު ރާއްޖޭގެ 12 އަތޮޅެއްގައި އާރުޓީއެލްގެ ފެރީގެ ހިދުމަތް ކުރިއަށްދާނެއެވެ. މި ދެ އަތޮޅު ގުޅާލުމަށް ކަނޑައަޅާފައިވަނީ ނ. މަނަދޫ އާއި ރ. އުނގޫފާރެވެ.
މި ހިދުމަތް ފޯރުކޮށްދޭ މައި ކުންފުނި އެމްޓީސީސީން ބުނިގޮތުގައި، މި ހިދުމަތް ދިނުމުގައި ބޭނުންކުރާނީ 32 ފަސިންޖަރުންގެ ޖާގައިގެ ފެރީއެކެވެ. އަދި ހާއްސަ އެހީއަށް ބޭނުންވާ ފަރާތްތަކަށް އިސްކަންދިނުމުގެ ގޮތުން، އެންސްޕާގައި ރަޖިސްޓަރުކޮށްފައިވާ ފަރާތްތަކަށް ހާއްސަކޮށް ދެ ސީޓު ހަމަޖައްސާފައިވާނެއެވެ.
މީގެ އިތުރުން، އާރްޓީއެލްގެ ފެރީގެ ހިދުމަތަކީ އަގު ނަގައިގެން ދެމުން އަންނަ ހިދުމަތެއް ނަމަވެސް، އެންސްޕާގައި ރަޖިސްޓަރުކޮށްފައިވާ ހާއްސަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެ އިންތިޒާމު ވަނީ ހަމަޖައްސާފައެވެ.
ފެރީގެ ޓިކެޓު ނެގުމުގެ ހިދުމަތް އާރުޓީއެލްގެ ވެބްސައިޓާއި މޮބައިލް އެޕް މެދުވެރިކޮށް ފަސޭހަކަމާއެކު ލިބޭނެއެވެ. އަދި ކިއުއާރް ކޯޑު މެދުވެރިކޮށް ވެސް ޓިކެޓް ގަނެވޭނެ އިންތިޒާމު ވަނީ ހަމަޖައްސާފައެވެ.