މާލެ ސަރަހައްދުގެ ވައިގެ ފެންވަރު ސިއްހަތަށް ނުރައްކާވާ މިންވަރަށް ދަށްވެފައިވާކަމަށް އެއަރ ކޮލިޓީ އިންޑެކްސް މޮނިޓާތަކުން ދައްކައިފިއެވެ. ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީސްގައި ހަރުކޮށްފައިވާ ސިސްޓަމުން ދައްކާގޮތުގައި، މާލެ ސަރަހައްދުގެ ވައިގެ ކޮލިޓީ މިވަގުތު ހުރީ 170 ގައެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ މިންގަނޑުތަކަށް ބަލާއިރު، މިއީ އެންމެންގެ ސިއްހަތަށްވެސް ނުރައްކާވާ ފަދަ “ރެޑް އެލާޓް” ގެ ހާލަތެކެވެ.
ވައި ނުސާފުވުމުގެ ސަބަބުން ނޭވާލާ ނިޒާމުގެ މައްސަލަތައް ކުރިމަތިވުމުގެ ފުރުސަތު ބޮޑުވެފައިވާއިރު، ހާއްސަކޮށް ނާޒުކު ހާލަތްތަކުގައި ތިބި މީހުން ސަމާލުވުމަށް އެޗްޕީއޭއިން ވަނީ އިލްތިމާސްކޮށްފައެވެ. މީގެ ތެރޭގައި ތުއްތު ކުދިންނާއި، އުމުރުން ދުވަސްވީ މީހުންނާއި، މާބަނޑު މީހުންގެ އިތުރުން ނޭވާލާ ނިޒާމާއި ހިތުގެ ބަލިތަކަށް ފަރުވާ ހޯދަމުންދާ ފަރާތްތައް ހިމެނެއެވެ. މިފަދަ ފަރާތްތަކުން ބޭރުގައި އުޅުމުގައި ހާއްސަ ސަމާލުކަމެއް ދިނުމަކީ ކޮންމެހެން ބޭނުންތެރި ކަމެކެވެ.
ރައްކާތެރިކަމުގެ ފިޔަވަޅެއްގެ ގޮތުން ބޭރުގައި ކަސްރަތު ކުރުމާއި ކުޅިވަރު ކުޅުން ފަދަ ކަންކަން މަޑުޖައްސާލުމަށް ކަމާބެހޭ އިދާރާތަކުން ވަނީ ލަފާދީފައެވެ. ބޭރަށް ނުކުންނަން ޖެހޭ ހާލަތްތަކުގައި އެން95 މާސްކު އެޅުމަށާއި، ގޭތެރެއަށް ނުސާފު ވައި ނުވަންނާނެހެން ދޮރުތައް ލައްޕާފައި ބެހެއްޓުމަށްވެސް ވަނީ އިރުޝާދު ދީފައެވެ. އަދި ގޭތެރޭގައި އެއަރ ޕިއުރިފައިއަރ ބޭނުންކުރުމަކީ މި ހާލަތުގައި ލިބޭނެ އިތުރު ރައްކާތެރިކަމެއް ކަމަށް އެޗްޕީއޭއިން ފާހަގަކުރެއެވެ.
މާލެ ސަރަހައްދު ރަތް ސަމާލުގައި އޮތްއިރު، ރާއްޖޭގެ މެދުތެރޭގެ ބައެއް ރަށްތައް އޮތީ އޮރެންޖް ސަމާލުގައެވެ. އަދި ބައެއް އެހެން ސަރަހައްދުތަކަށް ވަނީ ރީނދޫ ސަމާލު ނެރެފައެވެ. މި ސަރަހައްދުތަކުގައިވެސް ބަލި މީހުންނާއި ކުޑަކުދިން ބޭރުގައި އުޅުން މަދުކުރުމަށާއި، ކޮންމެހެން ބޭރަށް ނުކުންނަން ޖެހިއްޖެ ހާލަތެއްގައި މާސްކު އެޅުމަށް ވަނީ އަންގާފައެވެ. ވައިގެ ނުސާފުކަން ހުރި މިންވަރު އައިކިއު އެއަރ ވެބްސައިޓް ނުވަތަ އެޕްލިކޭޝަން މެދުވެރިކޮށް ބަލަމުން ގެންދިއުމަށްވެސް ވަނީ އެދިފައެވެ.
ރާއްޖޭގެ ވައި މިދުވަސްވަރު ނުސާފުވަމުންދަނީ އިރުވައި މޫސުމުގެ ވަޔާއެކު އިންޑިއާ އަދި ހިމާލިޔާ ސަރަހައްދުން އަންނަ ދުމާއި ހިރަފުހުގެ ސަބަބުންނެވެ. މިއީ ކޮންމެ އަހަރެއްގެވެސް މި ދުވަސްވަރު ރާއްޖެއަށް ކުރިމަތިވާ މޫސުމީ މައްސަލައެކެވެ.