ކުރިއަށް އޮތް ރަމަޟާން މަހަށް ތައްޔާރުވުމުގެ ގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިންތިޒާމުކުރާ “ރޯދަ ބާޒާރު” މާދަމާ ހުޅުމާލޭގައި ފެށުމަށް ތައްޔާރުވެއްޖެއެވެ. މިއީ ރޯދައަށް ތައްޔާރުވުމަށް އެ ކޯޕަރޭޝަނުން ކުރިއަށްގެންދާ ސިލްސިލާ މަސައްކަތްތަކުގެ ތެރެއިން ހިންގާ މުހިންމު ހަރަކާތެކެވެ.
އެޗްޑީސީއާއި ހައިރައިސް ގުޅިގެން ކުރިއަށްގެންދާ މި ބާޒާރު އޮންނާނީ ހުޅުމާލޭ ސެންޓްރަލް ޕާކުގައެވެ. މާދަމާއިން ފެށިގެން އަންނަ ހޮނިހިރު ދުވަހުގެ ނިޔަލަށް ކުރިއަށްދާ މި ބާޒާރު ހުޅުވިފައި ހުންނާނީ ކޮންމެ ދުވަހެއްގެ ހަވީރު 04:00 އިން 06:00 އަށް އަދި ރޭގަނޑު 08:00 އިން 11:30 އަށެވެ.
އެޗްޑީސީން ހާމަކުރިގޮތުގައި މި ބާޒާރުގައި ޖުމްލަ 50 ސްޓޯލް ބެހެއްޓުމަށް ވަނީ ނިންމާފައެވެ. މި ސްޓޯލްތަކުން ކައްކާ ތެއްޔާއި، ބަދިގޭގައި ހިފާ ގެންގުޅޭ ސާމާނާއި، ގޭތެރެ ޒީނަތްތެރިކުރާ ތަކެއްޗާއި، އަންނައުނުގެ އިތުރުން ހާޑްވެއާ ސާމާނާއި ތަފާތު ބާވަތްތަކުގެ ކާބޯތަކެތި ލިބެން ހުންނާނެއެވެ.
މިއީ ރަމަޟާން މަހަށް ގޭތެރެއަށް ބޭނުންވާ ތަކެތި އެއްތަނަކުން އަގުހެޔޮކޮށް ރައްޔިތުންނަށް ފޯރުކޮށްދިނުމަށް ހުޅުވާލާ ފުރުސަތެއްކަމަށް އެޗްޑީސީން ބުނެއެވެ.
އެޗްޑީސީން ހާމަކުރި ގޮތުގައި މިފަދަ ބާޒާރެއް އިންތިޒާމުކުރުމުގެ މައިގަނޑު މަގުސަދަކީ ހުޅުމާލެއަކީ ހުރިހާ ހިދުމަތެއް ފަސޭހަކަމާއެކު ލިބެން ހުންނަ ހިތްފަސޭހަ ތަނަކަށް ހެދުމެވެ.