ޗާގޯސް މައްސަލައިގައި ރާއްޖެއިން ވަކާލާތު ކުރަމުން ދަނިކޮށް، މޮރިޝަސް އިން ރާއްޖެއާ ސިޔާސީ ގުޅުން ކަނޑާލުމަށް ނިންމި ނިންމުމަކީ ވަރަށް މޮޔަ އަދި ތަސައްރަފު ނުފުދޭ ނިންމުމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މޮރިޝަސް އިން މި ނިންމުން ނިންމާފައިވަނީ އެއްވެސް މަޝްވަރާއެއް ކުރުމެއް ނެތި އަމިއްލައަށް ކަމަށެވެ.
ރައީސް މުއިއްޒު ފާހަގަކުރެއްވި ގޮތުގައި އިނގިރޭސީންނާ ހަވާލުކުރި ޗާގޯސް ހިމެނޭ ކަނޑުގެ ސަރަހައްދުގެ ހައްގުކަން ބޮޑީ ރާއްޖެއަށެވެ. އަދި މޮރިޝަސް އިން ނިންމި ނިންމުމުގެ ސަބަބުން އެ ހަގީގަތް ބަދަލުވެގެން ނުދާނެ ކަމަށްވެސް އެމަނިކުފާނު ވިދާޅުވިއެވެ.
“މޮރިޝަސް އިން ރާއްޖެއާ ސިޔާސީ ގުޅުން ކަނޑާލުމަކީ ވަރަށް ތާކުންތާކު ނުޖެހޭ ވަރަށް އިމެޗުއާ، ނައީވް ކަމެއް. އެ ނިންމުން އެހެން ނިންމުމަކުން ހަގީގަތް ބަދަލެއް ނުވޭ،” ރައީސް ވިދާޅުވިއެވެ.
މޮރިޝަސް އިން ރާއްޖެއާ ސިޔާސީ ގުޅުން ކަނޑާލި ނަމަވެސް، އެ ގައުމަށް ހައްގު ނޫން ތަނެއް އެ ގައުމަށް ހައްގު ނުވާނެ ކަމަށް ރައީސް ތަކުރާރުކޮށް ވިދާޅުވިއެވެ. މި ނިންމުމުގެ ސަބަބުން ރާއްޖެއަށް ކުރާނެ ވަކި އަސަރެއް ނެތް ކަމަށާއި، ރާއްޖެއިން ކުރިއަށްދާނީ ސަރުކާރުގެ “މޯލްޑިވްސް ފަސްޓް” ޕޮލިސީގެ ދަށުން ގައުމުގެ މަސްލަހަތު އިސްކޮށްގެން ކަމަށްވެސް އެމަނިކުފާނު ވިދާޅުވިއެވެ.
މޮރިޝަސްގެ ކެބިނެޓުން ރާއްޖެއާ ސިޔާސީ ގުޅުން ކަނޑާލަން ނިންމީ މިދިޔަ މަހުގެ 27 ވަނަ ދުވަހުއެވެ. ރާއްޖެއާއި މޮރިޝަސްއާ ދެމެދު ސިޔާސީ ގުޅުން ފުރަތަމަ ގާއިމުކޮށްފައިވަނީ 15 ޖެނުއަރީ 1981 ގައެވެ.