އެމެރިކާ އާއި އިޒްރޭލުން އިސްވެ އިރާނަށް ދެމުންދާ ހަމަލާތަކާ ގުޅިގެން މެދުއިރުމަތީގެ މަސްރަހު ގޯސްވެފައިވީ ނަމަވެސް، ރާއްޖެއަށް ތެލާއި ކާބޯތަކެތި ލިބުމުގައި އެއްވެސް ކަންބޮޑުވުމެއް ނެތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މި ހަނގުރާމައިގެ ސަބަބުން ރާއްޖެއަށް ކުރިމަތިވެދާނެ ގޮންޖެހުންތަކުން އަރައިގަތުމަށްޓަކައި ހާއްސަ ކޮމެޓީއެއް އުފައްދައި، ކަމާބެހޭ ހުރިހާ ދާއިރާތަކުން ގުޅިގެން މަސައްކަތް ކުރަމުންދާ ކަމަށެވެ.
ރައީސް ވިދާޅުވި ގޮތުގައި ރާއްޖެއަށް ބޭނުންވާ ތެޔޮ ލިބުމުގެ އިންތިޒާމުތައް ވަރަށް ރަނގަޅަށް ހަމަޖެހިފައިވާ ކަމަށާއި، ކުރިއަށް އޮތް ދުވަސްތަކުގައިވެސް ތެޔޮ ނުލިބިދާނެ ފަދަ އެއްވެސް ނިޝާނެއް ނެތް ކަމަށެވެ. މީގެ އިތުރުން ކާބޯތަކެތީގެ ރައްކާތެރިކަން ކަށަވަރު ކުރުމުގެ މަސައްކަތްވެސް ބަރާބަރަށް ކުރިއަށްދާ ކަމުގެ ޔަގީންކަން އެމަނިކުފާނު ދެއްވިއެވެ.
“ތެލަށް ބަލާއިރުގަ ތެލަށް އަދި އެއްވެސް ކަހަލަ ކަންބޮޑުވުންތަކެއް އަޅުގަނޑުމެންނަކަށް ދިމަލެއް ނުވޭ،” ރައީސް ވިދާޅުވިއެވެ.
މެދުއިރުމަތީގެ ބައެއް ގައުމުތަކުގެ ވައިގެ ސަރަހައްދު ބަންދުކުރުމާ ގުޅިގެން ދަތުރުފަތުރަށް ބުރުލެއް އަރާފައިވާއިރު، ރާއްޖޭގެ ފަތުރުވެރިކަމަށް ކުރާ އަސަރު ކުޑަކުރުމަށް ސަރުކާރުން ދަނީ ފިޔަވަޅުތައް އަޅަމުންނެވެ. އެގޮތުން ރާއްޖޭގައި ތާށިވެފައި ތިބި ފަތުރުވެރިންނަށް ފުރޭނެ ބަދަލު މަގުތައް ހޯދައިދިނުމާއި، އަލަށް އަންނަ ފަތުރުވެރިންނަށް މެދުއިރުމަތީގެ ވައިގެ ސަރަހައްދު ބޭނުން ނުކޮށް ރާއްޖެ އާދެވޭނެ އިންތިޒާމުތައް އެއާލައިންތަކާ ގުޅިގެން ހަމަޖައްސަމުންދާ ކަމަށް ރައީސް ފާހަގަކުރެއްވިއެވެ.
ހަނގުރާމަ ހިނގަމުންދާ ސަރަހައްދުތަކުގައި ތިބި ދިވެހިންގެ ހާލަތު ސަރުކާރުން ވަރަށް ގާތުން ބަލަމުންދާ ކަމަށްވެސް ރައީސް ވިދާޅުވިއެވެ. މިހާތަނަށް ބެލި ބެލުމުން އެއްވެސް ދިވެއްސަކަށް ނުރައްކާތެރި ނުވަތަ ކަންބޮޑުވާންޖެހޭ ފަދަ ހާލަތެއް ދިމާވެފައި ނުވާ ކަމަށާއި، ނަމަވެސް އެ ސަރަހައްދުތަކުގައި ތިބި ދިވެހިންގެ ރައްކާތެރިކަން ކަށަވަރު ކުރުމަށް ކުރަންޖެހޭ ހުރިހާ މަސައްކަތެއް މެދުކެނޑުމެއް ނެތް ކުރިއަށްދާނެ ކަމަށް އެމަނިކުފާނު ވިދާޅުވިއެވެ.