ރާއްޖޭގައި ވަރަށް އަވަހަށް ޕޭޕަލްގެ ހިދުމަތް ފަށާނެ ކަމަށާއި، މިހާރު ކުރިއަށްދަނީ އެ ހިދުމަތް ލޯންޗުކުރުމުގެ ކުރިން ފުރިހަމަކުރަންޖެހޭ ޓެސްޓިން މަރުހަލާތައް ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު ސައީދު ވިދާޅުވީ، ޕޭޕަލްގެ ހިދުމަތް ރާއްޖެއަށް ތައާރަފުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެއް ކަމަށެވެ. އަދި މި މަސައްކަތް މިހާރު ވަރަށް ބާރަށް ކުރިއަށްދާ ކަމަށާއި، އިރާދަކުރެއްވިއްޔާ ދާދި އަވަހަށް މި ހިދުމަތް ރާއްޖޭގައި ލިބެން ފަށާނެ ކަމަށް މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ ޕޭޕަލްގެ ހިދުމަތް ފަށާނެ ވަކި ތާރީހެއް ނުވަތަ ޓައިމްލައިނެއް ވަރަށް އަވަހަށް ހާމަކުރައްވާނެ ކަމަށެވެ. މިވަގުތު ޓައިމްލައިނެއް ދޭން ދަތިވަނީ ޓެސްޓިން މަރުހަލާތަކެއް ކުރިއަށްދާތީކަން ފާހަގަކުރައްވައި މިނިސްޓަރު ވިދާޅުވީ، “ޕޭޕަލްއަކީ ދުނިޔޭގެ ވަރަށް ޕްރެސްޓީޖަސް ޕޭމަންޓް ގޭޓްވޭއެއް. ރާއްޖޭގެ ޕޭމަންޓް ނިޒާމު، ޕޭޕަލް ބޭނުންވާވަރަށް ޑިވެލޮޕް ވާން ޖެހޭ،” ކަމަށެވެ.
މި ހިދުމަތުގެ ސަބަބުން ރާއްޖޭގެ ކުދި ވިޔަފާރިތަކަށާއި، ވަކިން ހާއްސަކޮށް އޮންލައިންކޮށް ވިޔަފާރިކުރާ ފަރާތްތަކަށް ބޮޑެތި ކުރިއެރުންތަކެއް ލިބިގެންދާނެ ކަމަށް ސަރުކާރުން ގަބޫލުކުރެ އެވެ. ޕޭޕަލް މެދުވެރިކޮށް ފައިސާ ފޮނުވުމާއި، ފައިސާ ބަލައިގަތުމުގެ އިތުރުން އޮންލައިން މުއާމަލާތްތައް ބައިނަލްއަގްވާމީ އެންމެ ކުރިއަރާފައިވާ ގައުމުތަކެކޭ އެއްފަދައިން ރާއްޖޭގައި ވެސް ކުރެވޭނެ ކަމުގެ ޔަގީންކަން މިނިސްޓަރު ދެއްވި އެވެ.