މި އަހަރުގެ ރަމަޟާން މަހުގެ ފަހު ދިހައެއްގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވީ ނަމަވެސް، އެ މުއްދަތުގެ ތެރެއިން ހަތަރު ދުވަހެއްގައި އައިޑީކާޑު ދޫކުރުމުގެ ހިދުމަތް ދިނުމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން ނިންމައިފިއެވެ.
ޑީއެންއާރުން މިއަދު ކުރި އިއުލާނެއްގައި ބުނެފައިވަނީ، ފަހު ދިހައިގެ ބަންދު ދުވަސްތަކުގެ ތެރެއިން އައިޑީކާޑު ދޫކުރުމުގެ ހިދުމަތް ދިނުމަށް ހަމަޖެހިފައިވަނީ މި މަހުގެ 11، 15، 17 އަދި 19 ވަނަ ދުވަހު ކަމަށެވެ. މި ހަތަރު ދުވަހުވެސް ހިދުމަތް ދިނުމަށް ހަމަޖެހިފައިވަނީ ހެނދުނު 9:00 އިން މެންދުރުފަހު 1:00 އަށެވެ.
މާލެ ސަރަހައްދުގައި ދިރިއުޅޭ ރައްޔިތުންނަށް އައިޑީކާޑު ދޫކުރުމުގެ މަސައްކަތް ކުރިއަށްދާނީ ތިރީގައިވާ ތަންތަނުންނެވެ:
- ވެލާނާގޭގައި ހުންނަ ޑީއެންއާރުގެ މައި އޮފީސް
- ހުޅުމާލެ ފޭސް 1 ގައި ހުންނަ އުމަރު ޒާހިރު ބިލްޑިންގ
- ހުޅުމާލެ ފޭސް 2 ގައި ހުންނަ ވިނަރެސް ޓަވަރު
- ވިލިމާލޭގައި ހުންނަ ޑީއެންއާރުގެ އޮފީސް
ރޯދަމަހުގެ ފަހުދިހައާއި ފިތުރު އީދުގެ ބަންދާ ގުޅިގެން، އަންނަ ހޯމަ ދުވަހުން ފެށިގެން މި މަހުގެ 21 ވަނަ ދުވަހުގެ ނިޔަލަށް ސަރުކާރުގެ އޮފީސްތައް ބަންދުވާނެއެވެ. ޑީއެންއާރުން މި ހިދުމަތް ދިނުމަށް ނިންމާފައިވަނީ މި ދިގު ބަންދުގެ ތެރޭގައި އާންމުންނަށް ދިމާވެދާނެ ދަތިތަކަށް ހައްލެއް ހޯދައިދިނުމުގެ ގޮތުންނެވެ.
ސަރުކާރުގެ ރަސްމީ މަސައްކަތްތައް އަލުން ފެށުމަށް ހަމަޖެހިފައިވަނީ މި މަހުގެ 22 ވާ ހޯމަ ދުވަހުއެވެ.