އަމިއްލަ އުމްރާ ގްރޫޕެއް ކަމަށްވާ އަލް އަބްރާރް ގްރޫޕުގެ ހަވާލުގައި އުމްރާއަށް ފުރުމަށް ހަމަޖެހި، ނުފުރި ތިބި މީހުންގެ ތެރެއިން 28 މީހަކަށް މޯލްޑިވްސް ހައްޖު ކޯޕަރޭޝަނުން ޖާގަ ހަމަޖައްސައިދީފިއެވެ. ހައްޖު ކޯޕަރޭޝަންގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ، އަމިއްލަ ގްރޫޕަކުން ފައިސާ ނެގުމަށްފަހު އިންތިޒާމުތައް ހަމަނުޖެއްސުމުގެ ސަބަބުން ހާލުގައި ޖެހުނު މީހުންގެ އެދުމުގެ މަތިން، އެ ކޯޕަރޭޝަނުން ޖާގަ އޮތް މިންވަރަކުން ފުރުސަތު ދީފައިވާ ކަމަށެވެ. މިގޮތުން ޖާގަ ލިބުނު 28 މީހުން ބުދަ ދުވަހު ހެނދުނު މޯލްޑިވިއަންގެ ފްލައިޓެއްގައި ވަނީ ސައުދީ އަރަބިއްޔާއަށް ފުރާފައެވެ.
އަލް އަބްރާރް ގްރޫޕަށް ފައިސާ ދެއްކި 110 މީހަކަށް ނުފުރުނު މައްސަލަ ފެންމަތިވީ އަންގާރަ ދުވަހުގެރޭގެ ވަގުތެއްގައެވެ. މިކަމާ ގުޅިގެން ކަންބޮޑުވުން ފާޅުކުރުމަށް ގިނަ ބަޔަކު ވަނީ އެ ޖަމާއަތުގެ އޮފީސް ހުންނަ ސަރަހައްދަށް އެއްވެފައެވެ. އުމްރާއަށް ދިއުމަށް ތައްޔާރުވި މީހުން ބުނި ގޮތުގައި، ފުރުމުގެ ކުރިން ދަބަސްތައް ގެންދިއުމަށް އެކި ފަހަރު މަތިން އެކި ގޮތަށް އެންގުމަށްފަހު، އެންމެ ފަހު ވަގުތު އިންތިޒާމުތައް ވަނީ ހަމަނުޖެހިފައެވެ. މި ހާދިސާއާ ގުޅިގެން އެއްވި މީހުން ވަނީ އެ މީހުން ދެއްކި ފައިސާ އަނބުރާ ދިނުމަށް ގޮވާލާފައެވެ.
މި މައްސަލަ ހޫނުވުމާ ގުޅިގެން، ޓިކެޓު ފައިސާ ފިޔަވައި އެހެނިހެން ހަރަދުތަކަށްވާ ފައިސާ ރިފަންޑު ކޮށްދިނުމުގެ މަސައްކަތް ރޭގެ ވަގުތެއްގައި އެ ގްރޫޕުން ވަނީ ފަށާފައެވެ. ނަމަވެސް ގިނަ ބަޔަކު ތިބީ އެ މީހުންނަށް ލިބުނު މާލީ އަދި ނަފްސާނީ ގެއްލުމުގެ ސަބަބުން ވަރަށް ބޮޑަށް މާޔޫސްވެފައެވެ. ސަރުކާރުގެ ކުންފުނިން މިކަމަށް އެހީތެރިކަން ފޯރުކޮށްދިނީ އިންސާނީ އެހީތެރިކަމުގެ ގޮތުން، އެ މީހުންގެ އުމްރާގެ ދަތުރު ކާމިޔާބު ކޮށްދިނުމުގެ މަގްސަދުގައެވެ.
ފަހަކަށް އައިސް އުމްރާއަށް މީހުން ގެންދިއުމަށް ފައިސާ ނެގުމަށްފަހު، އެކި ގްރޫޕްތަކުން އޮޅުވާލާ މައްސަލަ ވަނީ ރާއްޖޭގައި އިތުރުވެފައެވެ. މިފަދަ މައްސަލަތަކާ ގުޅިގެން މީގެ ކުރިން ބައެއް ގްރޫޕްތަކުގެ ހުއްދަ ބާތިލުކޮށް، ބޮޑެތި އަދަދުތަކުން ޖޫރިމަނާކޮށްފައިވެއެވެ. އަދި ބައެއް ގްރޫޕްތަކުގެ އިސްވެރިންގެ މައްޗަށް ޖިނާއީ ދައުވާ އުފުލައި ޝަރީއަތްތައް ވެސް ދަނީ ހިނގަމުންނެވެ. ކަމާބެހޭ އިދާރާތަކުން އިލްތިމާސް ކުރަނީ އުމްރާއަށް ފައިސާ ދެއްކުމުގެ ކުރިން އެ ގްރޫޕަކީ ހުއްދަ އޮތް އިތުބާރު ހުރި ތަނެއްތޯ ކަށަވަރު ކުރުމަށެވެ.