ބޭރު ގައުމުތަކުގައި ހިނގަމުންދާ ހަނގުރާމަތަކުގައި ބައިވެރިވުމަށް ގޮސް އުޅެނިކޮށް، ތުރުކީގައި ތާށިވެފައި ތިބި ދިވެހި މަޔަކާއި އޭނާގެ ދަރިފުޅު އަނބުރާ ރާއްޖެ ގެނެސްފައިވާ ކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިޙްސާން ހާމަކުރައްވައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، ރާއްޖެ ގެނެސްފައިވަނީ 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ ކަމަށެވެ.
މިނިސްޓަރު އިޙްސާން ވިދާޅުވި ގޮތުގައި، މި ދެމައިން ރާއްޖެ ގެނައުމަށްފަހު، މިފަދަ ހާލަތްތަކުގައި އަންނަ ފަރާތްތަކަށް ހާއްސަކޮށްގެން ކުރިއަށްގެންދާ ރީއިންޓަގްރޭޝަން ޕްރޮގްރާމްތައް މިހާރު ވަނީ ފަށާފައެވެ. މި ޕްރޮގްރާމަކީ ހަނގުރާމަވެރި ސަރަހައްދުތަކުން އަންނަ ފަރާތްތައް އަލުން މުޖުތަމައަށް ނެރުމުގެ ކުރިން ފުރިހަމަކުރަންޖެހޭ މުހިންމު މަރުހަލާއެއްކަން މިނިސްޓަރު ފާހަގަކުރެއްވިއެވެ.
ހަނގުރާމަވެރި އެކި ސަރަހައްދުތަކަށް ގޮސް އަނބުރާ ނާދެވި ތާށިވެފައި ތިބި ދިވެހިންނާއި، އެމީހުންގެ އާއިލާތައް ރާއްޖެ ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްކަންދެއްވާ ކަމެއްކަމަށް މިނިސްޓަރު ވިދާޅުވިއެވެ. އެގޮތުން، ހަނގުރާމައިގައި ބައިވެރިވާން ދިޔަ މީހުންނާއި އެމީހުންނާއެކު ދިޔަ އާއިލާގެ މެންބަރުން އަނބުރާ ގެނައުމުގެ މަސައްކަތް ރައީސްގެ އިރުޝާދުގެ ދަށުން މިހާރު ވަނީ ހަރުދަނާކޮށްފައެވެ.
މީގެ ކުރިންވެސް މިފަދަ ހާލަތްތަކުގައި ތިބި 23 މީހަކު ރާއްޖެ ގެނެސް ރީއިންޓަގްރޭޓް ކޮށްފައިވާކަން ފާހަގަކުރައްވަމުން މިނިސްޓަރު ވިދާޅުވީ، ސީރިޔާގެ ދެ ސަރަހައްދެއްގައި ތާށިވެފައި ތިބި އިތުރު 60 އެއްހާ ދިވެހިން އަނބުރާ ގެނައުމުގެ މަސައްކަތްވެސް ސަރުކާރުން ހުއްޓުމެއްނެތި ކުރަމުންދާ ކަމަށެވެ.