ރާއްޖޭގެ ކަނޑުގެ ސަރަޙައްދުން ބައެއް ގެއްލުނީ ނިމިދިޔަ އެމްޑީޕީ ސަރުކާރުން ގަސްތުގައި ކުރި ކަންތައްތަކެއްގެ ސަބަބުން ކަމަށާއި، އެއީ ޤައުމަށް އެންމެ މަތީ ދަރަޖާގައި ޣައްދާރުވުން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރޭ ވިދާޅުވެއްޖެއެވެ.
“ދަ ގްރޭޓަރ އައްޑޫ ވިޝަން” ގެ ތަފްސީލު ލޯންޗުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ފޯޅަވަހީގެ މައްސަލައިގައި މޮރިޝަސްއިން އާބިޓްރޭޝަނަށް ހުށަހެޅި މައްސަލަ ނިމޭ ގޮތަކުން ޗެލެންޖު ކުރުމުގެ ފުރުސަތު އޮއްވައި، ކުރީ ސަރުކާރުން އިސްވެ އެ މައްސަލަ އިޓްލޮސްއަށް ހުށަހެޅީ ކަމަށެވެ.
ރައީސް ވިދާޅުވި ގޮތުގައި މި މައްސަލައިގައި ކުރީ ސަރުކާރުން އަމަލުކޮށްފައިވަނީ އެއްވެސް ޤައުމީ ވިސްނުމެއް ނެތި، ރައްޔިތުންގެ ފައިސާއިން 37 މިލިއަން ރުފިޔާ ޚަރަދުކޮށްގެން ކަމަށެވެ. އަދި މިކަން ކޮށްފައިވަނީ ރައްޔިތުންގެ މަޖިލީހުގެ އެއްވެސް ހުއްދައެއް ނެތި ސިއްރު ސިޓީއެއް ފޮނުވައިގެން ކަމަށްވެސް އެމަނިކުފާނު ފާހަގަކުރެއްވިއެވެ.
“ކަނޑައެޅިގެން ޤާނޫނު އަސާސީއާ ޚިލާފު، އެންމެ މަތީ ޚިޔާނާތުގެ ކުށަކަށްވާނެ ކަމެއް ކަމަށް އަޅުގަނޑަށް ޤަބޫލުކުރެވޭ ކަމެއް. އެންމެ މަތީ ޚިޔާނާތުގެ ކުށެއް ނުވަތަ ޤައުމަށް ޣައްދާރުވުމުގެ ކުށެއް މިކުރީ ޚަރަދުވެސް ކޮށްގެން،” ރައީސް ވިދާޅުވިއެވެ.
ކަނޑުގެ ސަރަޙައްދު ހޯދުމަށް ސަރުކާރަށް ލަފާދޭ ބައިނަލްއަޤްވާމީ މާޙިރުންވެސް، ކުރީ ސަރުކާރުން ޤައުމަށް ގެއްލުންވާނެ ފަދަ މަގަކުން މި މައްސަލަ ކުރިއަށް ގެންދިޔުމާ މެދު ސުވާލު އުފައްދާފައިވާ ކަމަށް ރައީސް ވިދާޅުވިއެވެ. މިކަމަކީ ބޮޑު ޚިޔާނާތަކަށް ވާތީ، ކުރީގެ ރައީސް އިބްރާހީމް މުޙައްމަދު ޞާލިޙް މޮރިޝަސްއަށް ފޮނުއްވި ސިޓީ އަނބުރާ ގެންނަވަން މިހާރުގެ ސަރުކާރުން ވަނީ ނިންމާފައެވެ. އެގޮތުން ރިޔާސީ ބަޔާން އިއްވެވި ދުވަހު އެ ސިޓީ އަނބުރާ ގެންނަވާކަން މޮރިޝަސް ސަރުކާރަށް ރަސްމީކޮށް އަންގާފައިވާ ކަމަށް ރައީސް ހާމަކުރެއްވިއެވެ.
ރައީސް މުޢިއްޒު އިތުރަށް ވިދާޅުވީ، ސަރުކާރުގެ މިހާރުގެ އަމާޒަކީ ބައިނަލްއަޤްވާމީ އިދާރާތަކަށް ހުށަހަޅައިގެން ރާއްޖެއަށް ގެއްލުނު ކަނޑުގެ ސަރަޙައްދު އަނބުރާ ހޯދުން ކަމަށެވެ. މި މަސައްކަތަކީ ގޮންޖެހުންތަކެއް ހުރި މަސައްކަތެއް ނަމަވެސް، އިރާދަކުރެއްވިއްޔާ އެކަން ކާމިޔާބު ކުރައްވާނެ ކަމުގެ ޔަޤީންކަން އެމަނިކުފާނު ދެއްވިއެވެ.
“މިހާރު ޗެލެންޖިން، ނަމަވެސް އިރާދަކުރެއްވިއްޔާ އެކަން ކާމިޔާބު ކުރާނަން. އެކަން އަޅުގަނޑުމެންނަށް ސާފު،” ރައީސް ވިދާޅުވިއެވެ.