ދިވެހި ގައުމަށް ހެޔޮ އެދޭ ކަމުގައިވާ ނަމަ، ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއް ދުވަހެއްގައި ބާއްވަން ޖެހޭ ކަމަށާއި އެއީ ރައްޔިތުން އިންތިހާބު ކުރާ ވެރިއަކަށް ހައްގު ގޮތުގައި ވެރިކަން ކުރަން ލިބޭނެ ފުރުސަތެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ޕީއެންސީގެ “ދަ ގްރޭޓާ އައްޑޫ ވިޝަން” ގެ ތަފްސީލް ލޯންޗު ކުރުމަށް އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ އެމަނިކުފާނު ވެރިކަމަށް ވަޑައިގަތް ފުރަތަމަ ދުވަސްކޮޅު، ރައްޔިތުންގެ މަޖިލިހުގައި އެމްޑީޕީގެ ސުޕަ މެޖޯރިޓީއެއް އޮތްއިރު، އެ ޕާޓީން މަސައްކަތް ކުރީ ރިޔާސީ އިންތިހާބުގައި ރައްޔިތުން ނިންމި ނިންމުން ބޮލާލައި ޖަހައި، އިތުބާރު ނެތް ކަމުގެ ވޯޓެއް ނެގުމަށް މަގު ކޮށަން ކަމަށެވެ. އަދި ރިޔާސީ އިންތިހާބަށް ފަހު މަޖިލިސް އިންތިހާބާ ދޭތެރޭ އޮންނަ ހަ މަސް ދުވަހަކީ ގައުމުގައި ހަމަނުޖެހުން އުފައްދަން އޮންނަ ދުވަސްވަރަކަށް ވުމަކީ ރަނގަޅު ކަމެއްގެ ގޮތުގައި އެއްވެސް ރައްޔިތަކު ގަބޫލު ނުކުރާނެ ކަމަށް ވެސް އެމަނިކުފާނު ވިދާޅުވިއެވެ.
ރައީސްގެ ވާހަކަފުޅުގައި ދެ އިންތިހާބު ވަކިވަކިން ބޭއްވުމުގެ ސަބަބުން ކުރިމަތިވެދާނެ ސިޔާސީ މައްސަލަތަކަށް އަލިއަޅުއްވާލެއްވިއެވެ. އެގޮތުން 2028 ވަނަ އަހަރު އެމްޑީޕީ ވެރިކަމަށް އައިސްފި ނަމަ، ރައްޔިތުންގެ މަޖިލިހުގެ ސުޕަ މެޖޯރިޓީ ހަ މަސް ދުވަސް ވަންދެން އޮންނާނީ ޕީއެންސީއަށް ކަން ފާހަގަ ކުރެއްވިއެވެ. އެހެންކަމުން، އެމްޑީޕީން ކަން ކުރަން އުޅުނު ގޮތަށް ރައްޔިތުން އިންތިހާބުކޮށްފައި ހުރި ވެރިއަކު މަގާމުން ވަކި ކުރުމުގެ ފުރުސަތު ޕީއެންސީގެ މެމްބަރުންނަށް ވެސް އޮންނާނެ ކަމަށާއި، ނަމަވެސް ޕީއެންސީއަކީ ގައުމުގެ ހަމަޖެހުމަށް ލޯބިކުރާ ޕާޓީއަކަށް ވާތީ އެފަދަ ވިސްނުމެއް ނެތް ކަމަށް ވިދާޅުވިއެވެ.
ރިޔާސީ އިންތިހާބާއި މަޖިލިސް އިންތިހާބާ ދޭތެރޭ ހަ މަސް ދުވަހުގެ މުއްދަތެއް އޮތުމަކީ ތަރައްގީއަށް އެޅޭ ހުރަހެއްގެ ގޮތުގައި ރައީސް ސިފަކުރެއްވިއެވެ. އެމަނިކުފާނު ވިދާޅުވީ ރައްޔިތުން ރައީސަކު ހޮވަނީ ފަސް އަހަރުގެ މެނިފެސްޓޯ ތަންފީޒު ކުރަން ކަމަށާއި، ނަމަވެސް ފުރަތަމަ ހަ މަސް ދުވަސް އެހެން ކަމަކަށް ހުސްކުރަން ޖެހުމަކީ ރައްޔިތުންގެ ހައްގުތަކަށް އަރައިގަނެވޭ ކަމެއް ކަމަށެވެ.
“ރައްޔިތުން ހަވާލު ކުރަނީ ހަތަރު އަހަރާއި ހަ މަސް ދުވަހު ވެރިކަން ކުރާކަށް ނޫން. ރައްޔިތުން ހަވާލު ކުރަނީ ފަސް އަހަރު ވެރިކަން ކުރަން. ނަމަވެސް ފުރަތަމަ ހަ މަސް ދުވަސް މި ދަނީ މަޖިލިސް ތެރޭގައި ކޯޅުންތަކުގެ ތެރޭގައި ކަމަށްވާ ނަމަ، އެއީކީ ރައްޔިތުންނަކަށް އެއްވެސް ގޮތަކަށް އިންސާފުވެރި ގޮތެއް ނޫން،” ރައީސް ވިދާޅުވިއެވެ.
ރައީސްގެ ވާހަކަފުޅު ނިންމަވާލެއްވީ 2024 ވަނަ އަހަރުގެ ތަޖުރިބާ ހިއްސާ ކުރައްވަމުން، ގައުމުގެ ހަމަޖެހުމާއި ތަރައްގީއަށްޓަކައި ދެ އިންތިހާބު އެއްކޮށްލުމުގެ މުހިންމުކަން ތަކުރާރު ކުރައްވަމުންނެވެ.