މިއަހަރު ރާއްޖެއިން ޙައްޖުގެ އަޅުކަން އަދާކުރުމަށް ފުރާ މީހުން ދަތުރުކުރާނެ ތާރީޚުތަކާއި ފްލައިޓްތަކުގެ ތަފްސީލުތައް ކަމާބެހޭ ފަރާތްތަކުން މިއަދު އިޢުލާންކޮށްފިއެވެ. މި އަހަރު ޙައްޖާޖީން އުފުލުމަށްޓަކައި ޖުމްލަ 4 ފްލައިޓެއް ބޭއްވުމަށް ވަނީ ހަމަޖެހިފައެވެ.
މިދިޔަ އަހަރުން ފެށިގެން އަމަލުކުރަމުން އަންނަ އުސޫލުގެ ދަށުން، ޙައްޖާޖީންގެ 50 އިންސައްތަ މީހުން ދަތުރުކުރާނީ ސައުދީ އަރަބިއްޔާގެ ސައުދިއާ އެއާލައިންގައެވެ. އަދި ބާކީ 50 އިންސައްތަ މީހުން ދަތުރުކުރުމަށް ހަމަޖެހިފައިވަނީ ރާއްޖޭގެ ޤައުމީ އެއާލައިން، މޯލްޑިވިއަންގެ ފްލައިޓުތަކުގައެވެ.
ރާއްޖެއިން ޙައްޖާޖީން ފުރަން ފަށާނީ އަންނަ މޭ މަހުގެ 15 ވަނަ ދުވަހުއެވެ. ފުރުމުގެ ތާވަލު ތިރީގައި އެވަނީއެވެ:
- 15 މޭ: 242 މީހުން (ސައުދިއާ އެއާލައިން)
- 17 މޭ: 250 މީހުން (މޯލްޑިވިއަން)
- 18 މޭ: 243 މީހުން (ސައުދިއާ އެއާލައިން)
- 19 މޭ: 250 މީހުން (މޯލްޑިވިއަން)
ޙައްޖުގެ އަޅުކަމަށްފަހު ޙައްޖާޖީން އެނބުރި ރާއްޖެ އައުމަށް ހަމަޖެހިފައިވަނީ ޖޫން މަހުގެ ކުރީކޮޅުގައެވެ. އެގޮތުން ޖޫން 5 އަދި 8 ވަނަ ދުވަހު ޙައްޖާޖީން އުފުލާނީ ސައުދިއާ އެއާލައިންނެވެ. އަދި ޖޫން 7 އަދި 9 ވަނަ ދުވަހު ޙައްޖާޖީން ރާއްޖެ އަންނާނީ މޯލްޑިވިއަންގެ ފްލައިޓުތަކުގައެވެ.
މި ދަތުރުތަކުގައިވެސް ފުރަތަމަ ފްލައިޓުން 242 މީހުން، ދެވަނަ ފްލައިޓުން 250 މީހުން، ތިންވަނަ ފްލައިޓުން 243 މީހުން އަދި ފަހު ފްލައިޓުން 250 މީހުން ރާއްޖެ އައުމަށް ވަނީ ތާވަލުކުރެވިފައެވެ.