މިއަހަރުގެ ޙައްޖުގެ މާތް އަޅުކަން އަދާކުރުމަށް ދިވެހިރާއްޖެއިން މައްކާއަށްދާ ޙައްޖުވެރިންނަށް ފުރިހަމަ އިންތިޒާމުތަކެއް ހަމަޖެހޭނެކަމުގެ ޔަގީންކަން، ދިވެހި ޙައްޖުވެރިންނަށް ޚިދުމަތް ފޯރުކޮށްދިނުމުގައި އެހީތެރިކަން ފޯރުކޮށްދޭ ސައުދީގެ މުޠައްވިފް، ރަވާފް މިނާ އިން ދީފިއެވެ. މި ޔަގީންކަން ދީފައިވަނީ ޙައްޖު މިޝަނާއި ރަވާފް މިނާއާ ދެމެދު ބޭއްވުނު ޚާއްޞަ ބައްދަލުވުމެއްގައެވެ.
މި ބައްދަލުވުމުގައި ރަވާފް މިނާގެ ފަރާތުން ބައިވެރިވެވަޑައިގެންނެވީ ސީއީއޯ ޒުހައިރް ޢަބްދުލް ޙާމިދް ސަދަޔޯއެވެ. ދިވެހިރާއްޖޭގެ ފަރާތުން ބައިވެރިވެވަޑައިގެންނީ މައްކާގައި ޙައްޖުވެރިންނަށް ޚިދުމަތް ދެއްވުމަށް ޤާއިމުކުރާ އޮފީހުގެ ވެރިޔާ އައްޝައިޚް އިމްތިޠާއު ޢައްބާސް އާއި ޙައްޖު މިޝަންގެ މެންބަރުންނެވެ. މި ބައްދަލުވުމުގައި ޙާޖީން މައްކާއަށް އަންނަ ދުވަސްތަކަށް ތައްޔާރުވުމަށާއި، މަޝާއިރުތަކުގެ އިންތިޒާމްތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ.
އައްޝައިޚް އިމްތިޠާއު ޢައްބާސް ވިދާޅުވީ، މުޠައްވިފްގެ ފަރާތުން ހަމަޖައްސަންޖެހޭ އެންމެހާ އިންތިޒާމްތައް ސަޢޫދީ ސަރުކާރުން ދީފައިވާ މުޙުލަތުތަކަށް ކުރިއަށްދާ ކަމަށެވެ. “ފުރިހަމަ އިންތިޒާމްތަކެއް މި ޙައްޖު މޫސުމުގައިވެސް ލިބޭނެކަމުގެ ޔަގީންކަން ދެއްވި” ކަމަށް އޭނާ ފާހަގަކުރެއްވިއެވެ. މުޠައްވިފުންގެ މައިގަނޑު ޒިންމާއަކީ ޙާޖީންގެ ދަތުރުފަތުރާއި، ކެއިންބުއިމާއި، ޞިއްޙީ ޚިދުމަތްތަކުގެ އިތުރުން މައްކާ، މަދީނާ އަދި ޖިއްދާގެ ދަތުރުތައް އިންތިޒާމުކުރުމެވެ.
ރަވާފް މިނާގެ ސީއީއޯ ޒުހައިރް ޢަބްދުލް ޙާމިދް ވިދާޅުވީ، އާ ޕެކޭޖްތަކުގެ ދަށުން މިނާގެ އިންތިޒާމްތަކަށް ބޮޑެތި ކުރިއެރުންތަކެއް ގެނެސްފައިވާ ކަމަށެވެ. މީގެ ތެރޭގައި ފާޚަނާތައް އިތުރުކުރުމާއި، ކެއްކުމުގެ އިންތިޒާމްތައް އިތުރަށް ފުރިހަމަކުރުން ހިމެނެއެވެ. މީގެ އިތުރުން ޙާޖީންގެ ރައްކާތެރިކަމަށްޓަކައި “ނުސުކް ކާޑު” އާއި ސެކިއުރިޓީ ބޭންޑް ހަވާލުކުރުމުގެ ކަންކަންވެސް މުޠައްވިފުންގެ ބެލުމުގެ ދަށުން ކުރިއަށްދާނެއެވެ.
ސަޢުދީ ޢަރަބިއްޔާގެ ޙައްޖާއި ޢުމްރާ ވުޒާރާއިން ދިވެހިރާއްޖެއަށް ކަނޑައަޅުއްވާފައިވާ މުޠައްވިފް، ރަވާފް މިނާއަކީ ޙާޖީންނަށް ބޭނުންވާ ދީނީ ހޭލުންތެރިކަމާއި އިރުޝާދު ފޯރުކޮށްދިނުމުގައިވެސް މުހިންމު ދައުރެއް އަދާކުރާ ފަރާތެކެވެ. ޙާޖީން މައްކާއަށް ދާ ދުވަހުން ފެށިގެން އެނބުރި ރާއްޖެއަށް އަންނަންދެން އެންމެހާ ކަންކަން ބެލެހެއްޓުމުގައި މުޠައްވިފުން ހަރަކާތްތެރިވާނެއެވެ.