ލޯކަލް ގަވަރމަންޓް އޮތޯރިޓީ (އެލްޖީއޭ) ގެ އިދާރީ ހިންގުން ހަރުދަނާކުރުމުގެ ގޮތުން، އެ އޮތޯރިޓީގެ މުވައްޒަފުންނަކީ ސިވިލް ސާވިސްގެ މުވައްޒަފުން ކަމުގައި ހަމަޖެއްސުމަށް ސަރުކާރުގެ ފަރާތުން ރައްޔިތުންގެ މަޖިލީހަށް އިސްލާހެއް ހުށަހަޅައިފިއެވެ. ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ހުށަހެޅުއްވި މި ބިލަކީ ލާމަރުކަޒީ ގާނޫނަށް ގެނެވޭ މުހިންމު ބަދަލެކެވެ.
މި އިސްލާހުގެ ދަށުން އެލްޖީއޭގެ މުވައްޒަފުން އައްޔަންކުރުމާއި ވަކިކުރުމުގެ ބާރު ސިވިލް ސާވިސް ކޮމިޝަނަށް ލިބިގެންދާނެއެވެ. އަދި އިދާރާގެ ޒިންމާދާރު އިސްވެރިޔަކީ ސީއީއޯ ކަމުގައި ކަނޑައަޅައި، މުވައްޒަފުންގެ މުސާރައާއި އިނާޔަތްތައް ނޭޝަނަލް ޕޭ ކޮމިޝަނުން ކަނޑައަޅާ ގޮތަށް ވަނީ ހަމަޖައްސާފައެވެ.
މީގެ އިތުރުން، ކައުންސިލްތަކުން ފޯރުކޮށްދޭންޖެހޭ އާންމު ޚިދުމަތްތަކުގެ ތެރޭގައި “ކުނި މެނޭޖުކުރުމުގެ ޚިދުމަތް” ހިމެނުމަށް ވެސް މި ބިލުގައި ވަނީ ހުށަހަޅާފައެވެ. މިއީ ރަށްރަށުގެ ތިމާވެށި ރައްކާތެރިކުރުމަށާއި ކުނީގެ މައްސަލައަށް ދާއިމީ ހައްލެއް ހޯދުމަށް ކައުންސިލްތަކަށް ލިބިދޭ ބާރެއް ކަމަށް ސަރުކާރުން ބުނެއެވެ.
މި ބަދަލުތަކަށް އަމަލުކުރުމަށްޓަކައި، ގާނޫނު ފާސްވާތާ 30 ދުވަހުގެ ތެރޭގައި މުވައްޒަފުންގެ އައު އޮނިގަނޑު އެކުލަވާލައި ސިވިލް ސާވިސް ކޮމިޝަނަށް ހުށަހަޅަންޖެހެއެވެ. ސަރުކާރުން ގަބޫލުކުރާ ގޮތުގައި މި އިސްލާހުތަކުގެ ސަބަބުން އެލްޖީއޭގެ ހިންގުމަށާއި ކައުންސިލްތަކުގެ މަސައްކަތްތަކަށް ބޮޑެތި ކުރިއެރުންތަކެއް ލިބޭނެއެވެ.