ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަނުގައި ވޯޓުލުމަށް ބޭނުންވާ ފޮށިތައް އަންނަ ބުދަ ދުވަހު ފޮނުވަން ފަށާނެ ކަމަށް އިލެކްޝަންސް ކޮމިޝަނުން ހާމަކޮށްފިއެވެ. އެ ކޮމިޝަނުން ބުނި ގޮތުގައި އަންނަ މަހުގެ ތިން ވަނަ ދުވަހުން ފެށިގެން ވޯޓު ފޮށިތައް ފޮނުވުމުގެ އިންތިޒާމުތައް ވަނީ ހަމަޖެހިފައެވެ.
ޖޫން މަހުގެ 6 ވަނަ ދުވަހު ބޭއްވުމަށް ހަމަޖެހިފައިވާ މި އިންތިހާބުގައި ޖުމްލަ 4,121 މީހަކަށް ވޯޓުލުމުގެ ހައްގު ލިބިގެންވެއެވެ. މި އިންތިހާބަށް ޖުމްލަ ހަތް ވޯޓު ފޮށި ބެހެއްޓުމަށް ނިންމާފައިވާއިރު، އޭގެ ތެރޭގައި ހިމެނެނީ މާލޭގައި ދިރިއުޅޭ އެ ދާއިރާގެ ރައްޔިތުންނަށް ހާއްސަ ދެ ފޮށްޓާއި، އައްޑޫ ސިޓީގައި ބަހައްޓާ ފަސް ފޮށްޓެވެ. މާލޭގައި ވޯޓުލުން ކުރިއަށްދާނީ ދަރުމަވަންތަ ސްކޫލުގެ ދެކުނު އިމާރާތުގައެވެ. އަދި އައްޑޫގައި ވޯޓުލުން އޮންނާނީ ހިތަދޫ ސްކޫލުގައެވެ.
މި ބައި-އިލެކްޝަނުގައި ވާދަކުރައްވަނީ ރާއްޖޭގެ މައި ދެ ސިޔާސީ ޕާޓީގެ ކެންޑިޑޭޓުންނެވެ. އެގޮތުން ޕީއެންސީގެ ފަރާތުން ކެންޑިޑޭޓް ނަމްބަރު އެކެއްގެ ގޮތުގައި މޫލެކެޑެ ދާއިރާގެ ކުރީގެ ކައުންސިލަރު އަހްމަދު ސައީދު ވާދަކުރައްވާއިރު، އެމްޑީޕީގެ ފަރާތުން ކެންޑިޑޭޓް ނަމްބަރު ދޭއްގެ ގޮތުގައި ވާދަކުރައްވަނީ އައްޑޫ ސިޓީގެ ކުރީގެ މޭޔަރު އަބްދުﷲ ސާދިގު (ސޯބެ) އެވެ.
އިލެކްޝަންސް ކޮމިޝަނުން މައުލޫމާތު ދޭ ގޮތުގައި މި އިންތިހާބުގެ ވޯޓުލުން ކުރިއަށްދާނީ އަންނަ މަހުގެ 6 ވަނަ ދުވަހުގެ ހެނދުނު 8:00 އިން ހަވީރު 4:00 އަށެވެ.