ދެ މީހުންނާއެކު ދަތުރުކުރަމުންދިޔަ ލޯންޗެއް އެކްސިޑެންޓުވެ، އޭގައި ތިބި ދެ މީހުންނަށް ބޮޑެތި އަނިޔާތަކެއް ވެއްޖެއެވެ. މި ހާދިސާގައި އެކްސިޑެންޓުވެފައިވަނީ “ޓުއަރ ގާރޑް” ނަމަކަށް ކިޔާ ލޯންޗެކެވެ. މި ހާދިސާއާ ގުޅިގެން ލޯންޗަށް ވެސް ބޮޑެތި ގެއްލުންތަކެއް ލިބިފައިވާ ކަމަށް މައުލޫމާތު ލިބެއެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ވިދާޅުވީ، މި ހާދިސާގެ ރިޕޯޓް ލިބުމާއެކު އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަންއިން އެހީތެރިކަން ފޯރުކޮށްދޭން ފަށާފައިވާ ކަމަށެވެ. އެމްއެންޑީއެފްގެ ކޯސްޓްގާޑުން ދަނީ މި ހާދިސާއާ ގުޅިގެން ކަނޑުމަތީގައި ހަރަކާތްތެރިވަމުންނެވެ.
މި އެކްސިޑެންޓުގައި އަނިޔާވި ދެ ފަޅުވެރިންނަށް މިހާރު ދަނީ އައިޖީއެމް ހޮސްޕިޓަލުގައި ފަރުވާ ދެމުންނެވެ. އެމްއެންޑީއެފްއިން ހާމަކުރި ގޮތުގައި، ލޯންޗުގައި ތިބި ދެ މީހުންނަށްވެސް ވަނީ އެކި ވަރުގެ ބޮޑެތި އަނިޔާތަކެއް ލިބިފައެވެ. ނަމަވެސް އެމީހުންގެ ހާލަތާ ގުޅޭ އިތުރު ތަފްސީލެއް ހޮސްޕިޓަލުން އަދި ހާމައެއް ނުކުރެއެވެ.
މި ހާދިސާ ހިނގަން މެދުވެރިވި ސީދާ ސަބަބެއް މިހާތަނަށް ކަމާބެހޭ އެއްވެސް އިދާރާއަކުން ހާމަކޮށްފައެއް ނުވެއެވެ. މި އެކްސިޑެންޓާ ގުޅޭގޮތުން ބަލަންޖެހޭ ކަންކަން ކަމާބެހޭ ފަރާތްތަކުން މިހާރު ދަނީ ތަހުގީގު ކުރަމުންނެވެ.