ދިވެހިރާއްޖޭގައި ޢުމުރުން 16 އަހަރުން ދަށުގެ ކުދިން ސޯޝަލް މީޑިއާގެ ބައެއް މަންސަތައް ބޭނުންކުރުން މަނާކުރުމަށް ސަރުކާރުން ނިންމަވާފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިޢުލާނު ކުރައްވައިފިއެވެ. ރައީސުލްޖުމްހޫރިއްޔާ މިކަން ހާމަކުރެއްވީ ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ. މިއީ ޒުވާން ޖީލުގެ ރައްކާތެރިކަމަށްޓަކައި އެޅޭ މުހިންމު ފިޔަވަޅެއްގެ ގޮތުގައި އެމަނިކުފާނު ސިފަކުރެއްވިއެވެ.
ރައީސް ވިދާޅުވީ ދިވެހި މުޖުތަމަޢަކީ އިސްލާމީ ރިވެތި އުޞޫލުތަކާއި އަސާސްތަކުގެ މައްޗަށް ބިނާވެފައިވާ ގުޅުން ބަދަހި މުޖުތަމަޢެއް ކަމަށާއި، އެހެންކަމުން މުޖުތަމަޢުގައި ހުރި މައްސަލަތައް ޙައްލުކުރުމުގައި ޚާއްޞަ އިސްކަމެއް ދޭންޖެހޭ ކަމަށެވެ. އަދި ދުނިޔޭގެ އެހެން ޤައުމުތަކުގައިވެސް މިފަދަ މައްސަލަތައް ޙައްލުކުރުމަށް ގެންގުޅޭ އުޞޫލުތަކަށް ރިޢާޔަތްކޮށް، ރާއްޖޭގެ ކުޑަކުދިންނަށް އޮތް ނުރައްކާތައް ކުޑަކުރަންޖެހޭ ކަމަށް އެމަނިކުފާނު ފާހަގަކުރެއްވިއެވެ.
ސޯޝަލް މީޑިއާގެ ސަބަބުން ކުޑަކުދިންނަށް ކުރިމަތިވާ ނޭދެވޭ އަސަރުތަކުގެ މައްޗަށް އަލިއަޅުއްވާލައްވަމުން ރައީސް ވިދާޅުވީ، ކުޑަކުދިން މިހާރު ސޯޝަލް މީޑިއާގެ ނުރައްކާތަކަށް ނިސްބަތުން ބޮޑަށް ހުށަހެޅިފައިވާ ކަމަށެވެ. ޚާއްޞަކޮށް ‘ސައިބަރ ބުލީންގ’ އަކީ ކުދިންގެ ނަފްސާނީ ދުޅަހެޔޮކަމަށާއި މުސްތަޤުބަލަށް އޮތް ބޮޑު ގޮންޖެހުމެއްކަން ފާހަގަކުރައްވައި، އެފަދަ ކަންކަމުން ކުދިން ރައްކާތެރިކުރުމަކީ ސަރުކާރުގެ އަމާޒެއް ކަމަށް ވިދާޅުވިއެވެ.
މި ނިންމެވުމަކީ ބެލެނިވެރިންގެ މެދުގައި އަބަދުވެސް އޮތް ބޮޑު ކަންބޮޑުވުމަކަށް ލިބިގެންދާނެ ޙައްލެއްކަން ފާހަގަކުރައްވަމުން ރައީސް ވިދާޅުވީ، ބައިނަލްއަޤުވާމީ ފެންވަރުގައިވެސް މިއީ މިއަދު އޮތް ބޮޑު ގޮންޖެހުމެއް ކަމަށެވެ. އެހެންކަމުން، މި ފިޔަވަޅުގެ ސަބަބުން ކުޑަކުދިންނަށް އަމާން މުޖުތަމަޢެއް ބިނާކުރުމަށް މަގުފަހިވެގެންދާނެ ކަމަށް އެމަނިކުފާނު ވިދާޅުވިއެވެ.