ދުންފަތުގެ އިސްތިއުމާލުކުރުން ހުއްޓުވުމަށް ސަރުކާރުން ކަނޑައަޅާފައިވާ ސިޔާސަތުތަކަށް އެއްވެސް ބަދަލެއް ނާންނަ ކަމަށާއި، މިހާރު ކުރިއަށްދަނީ ފަންނީ މާހިރުންގެ ލަފަޔާއެކު އެ ނިންމުންތައް އިތުރަށް ހަރުދަނާކުރުމުގެ މަޝްވަރާތައް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ދުންފަތުގެ ޑިއުޓީއާ ގުޅޭގޮތުން ސަރުކާރުން “ޔޫ-ޓާނެއް” ނަގާފައިވާ ކަމަށް ދެކެވޭ ވާހަކަތަކަކީ ހަގީގަތާ ހިލާފު ވާހަކަތަކެއް ކަމަށެވެ.
ރައީސް މުއިއްޒު ފާހަގަކުރެއްވި ގޮތުގައި ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުމާއި ވޭޕް މަނާކުރުމަކީ ދުޅަހެޔޮ މުޖުތަމައުއެއް ބިނާކުރުމަށް ސަރުކާރުން އިސްނަގައިގެން އެޅި ހަރުދަނާ ފިޔަވަޅެކެވެ. މިއީ ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ވެސް ބަލައިގެންފައިވާ ނިންމުމެއްކަން ފާހަގަކުރައްވައި، ރައީސް ވިދާޅުވީ އެމަނިކުފާނު ކުރިން ދެއްކެވި ވާހަކަފުޅުތަކާއި މިހާރުގެ ނިންމުންތަކާ ދެމެދު އެއްވެސް ފުށުއެރުމެއް ނެތް ކަމަށެވެ.
“އަޅުގަނޑު އެދުވަހު ދެއްކި ވާހަކައަކާއި، އިއްޔެއަކާއި މިއަދަކާއި އަދި ކުރިން އޮތް ތަނަކުވެސް ތަފާތެއް ނާންނާނެ،” ރައީސް ވިދާޅުވިއެވެ.
ސިޔާސަތުތަކަށް ގެންނަ ބަދަލުތަކާ ގުޅޭގޮތުން ރައީސް ވިދާޅުވީ، ކޮންމެ ނިންމުމަކީވެސް ތަންފީޒުކުރަމުންދާއިރު ރިވިއު ކުރަންޖެހޭނެ ކަންކަން ކަމަށެވެ. އެގޮތުން ޑަބްލިއުއެޗްއޯ އާއި ޑަބްލިއުޓީއޯ ފަދަ ބައިނަލްއަގުވާމީ އިދާރާތަކުގެ ފަންނީ ލަފަޔާއި، ކަސްޓަމްސް އާއި އެޗްޕީއޭގެ ތަފާސްހިސާބުތަކަށް ބަލައި ގެންނަ “އެޖަސްޓްމަންޓްތަކަކީ” ސިޔާސަތު ރިވާސްކުރުން ނޫން ކަމަށާއި، އެއީ އެންމެ އެދެވޭ ނަތީޖާ ހާސިލުކުރުމަށް ކުރެވޭ މަސައްކަތެއް ކަމަށް އެމަނިކުފާނު ވިދާޅުވިއެވެ. .
ސަރުކާރުގެ އެންމެ ބޮޑު އަމާޒަކީ ދުންފަތުގެ ސަބަބުން ޖެހޭ ގައިންގަޔަށް ނާރާ ބަލިތަކުން ދިވެހި ރައްޔިތުން ސަލާމަތްކުރުން ކަމަށް ރައީސް ވިދާޅުވިއެވެ. އަދި މިކަމުގައި ނިންމާ ކޮންމެ ނިންމުމެއްވެސް ނިންމާނީ ގާނޫނީ އިމުގެ ތެރެއިން، ސައިންޓިފިކް ދިރާސާތަކާއި ފަންނީ ލަފާގެ މައްޗަށް ބިނާކޮށްގެން ކަމުގެ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައެވެ.