ދުނިޔޭގެ ކްރެޑިޓް ރޭޓިން އެޖެންސީ، ފިޗުން ރާއްޖޭގެ ކްރެޑިޓް ރޭޓިން މަތިކުރުމަކީ ރާއްޖޭގެ އިޤްތިޞާދީ މިސްރާބަށް އޮތް އިތުބާރު އާވެގެން ދިޔަ ކަމެއް ކަމަށް އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާއި ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ފިޗުން އެންމެފަހުން ނެރުނު ރޭޓިންގައި ރާއްޖެ ކުރިން އޮތް “ސީސީ” ރޭޓިންގުން ވަނީ “ސީސީސީ -” އަށް މަތިކޮށްފައެވެ. މިއީ ދުނިޔޭގެ ބާޒާރުގައި ނުތަނަވަސްކަން ހުރި ދަނޑިވަޅެއްގައި ރާއްޖޭގެ އިޤްތިޞާދު ހަމަމަގުގައި ހިފެހެއްޓުމުގެ ނަތީޖާއެއް ކަމަށް ސަރުކާރުން ފާހަގަކުރެއެވެ.
މިކަމާ ގުޅިގެން ވަޒީރު ސަޢީދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ގޮންޖެހުންތައް ބޮޑު ދުވަސްވަރެއްގައި މިފަދަ ކުރިއެރުމެއް ލިބުމަކީ ސަރުކާރުން ގެންގުޅުއްވާ ހަރުދަނާ އަދި ޒިންމާދާރު ލީޑަޝިޕްގެ ނަތީޖާ ކަމަށެވެ. ޚާއްޞަކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރާއްޖޭގެ މާލީ އިޤްތިޞާދީ ހަމަޖެހުން ގާއިމްކުރުމަށް ކުރައްވާ މަސައްކަތްޕުޅުތަކުގެ ސަބަބުން އިންވެސްޓަރުންގެ އިތުބާރު އަލުން ރާއްޖެއަށް ލިބިފައިވާކަން ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، ކުރީ ސަރުކާރުން ކުރިމަތިކުރުވި ދަރަނީގެ ބޮޑެތި މައްސަލަތައް ހައްލުކުރުމަށް ރައީސް ޑރ. މުޢިއްޒު ގެންގުޅުއްވާ ހަރުދަނާ ސިޔާސަތުތަކުގެ ފޮނި ނަތީޖާ މިއަދު ފެންނަމުންދާ ކަމަށެވެ. ފިޗްގެ މި ނިންމުމަކީ އިޤްތިޞާދީ ދެމެހެއްޓެނިވިކަން ކަށަވަރުކުރުމަށް ސަރުކާރުން ކުރަމުންދާ މަސައްކަތް ބައިނަލްއަޤުވާމީ މާލީ އިދާރާތަކުން ބަލައިގަންނަކަމުގެ ހެއްކެއް ކަމަށާއި، މީގެ ސަބަބުން ރާއްޖޭގެ އިޤްތިޞާދީ ވިލުންތެރިކަން އިތުރަށް ވަރުގަދަވާނެ ކަމަށްވެސް ވަޒީރު ވިދާޅުވިއެވެ.
ފިޗް ރޭޓިންގްސްގެ ރިޕޯޓުގައި ބަޔާންކޮށްފައިވާ ގޮތުގައި، ފަތުރުވެރިކަމުގެ ދާއިރާގެ ކުރިއެރުމާއި، އައު ރިސޯޓުތަކަށް ކުރެވޭ އިންވެސްޓްމަންޓްތަކުގެ ސަބަބުން މެދު ރާސްތާގައި ރާއްޖޭގެ އިޤްތިޞާދު ބާރުމިނެއްގައި ކުރިއަރާނެއެވެ. އަދި ފަތުރުވެރިކަމުގެ އިންފްރާސްޓްރަކްޗަރަށް ގެނެވޭ ތަރައްޤީއާއެކު ރާއްޖޭގެ އިޤްތިޞާދީ ދުވެލި ވަރުގަދަވާނެ ކަމަށް އެ އެޖެންސީން ލަފާކުރެއެވެ.