މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ދައުލަތުގެ އިދާރާތަކުން އަމިއްލަ އިސްނެގުމުގައި ހާމަކުރަންޖެހޭ މައުލޫމާތުތައް، އެ ގާނޫނަށް އަމަލުކުރަން ފެށި ފަހުން ފުރަތަމަ ފަހަރަށް ހުރިހާ މިނިސްޓްރީއަކުން އާންމުކޮށްފިއެވެ. އިންފޮމޭޝަން ކޮމިޝަނަރު އާހިދު ރަޝީދު މިއަދު ވިދާޅުވީ، މީގެ ކުރިން މިނިސްޓްރީތަކުން ހާމަކޮށްފައިވަނީ ގާނޫނުގައި ބުނާ މައުލޫމާތުގެ އެންމެ 34 އިންސައްތަ ކަމަށްވީ ނަމަވެސް، މިހާރު ހުރިހާ މިނިސްޓްރީއަކުންނާއި ރައީސް އޮފީހުން ވެސް އެ މައުލޫމާތުތައް ފުރިހަމައަށް ހާމަކޮށްފައިވާ ކަމަށެވެ.
އާރުޓީއައި ގާނޫނުގެ ދަށުން ކޮންމެ އިދާރާއަކުން ވެސް 13 ކަމަކާ ގުޅުންހުރި މައުލޫމާތު މަދުވެގެން އަހަރަކު އެއްފަހަރު އާންމުކުރަން ޖެހެއެވެ. މީގެ ތެރޭގައި އެ އިދާރާއަކަށް ކަނޑައެޅިފައިވާ ބަޖެޓާއި، ކުރަން ރާވާފައިވާ މަސައްކަތްތަކާއި، ކުރި ޚަރަދުތަކުގެ ތަފުސީލުގެ އިތުރުން، މުވައްޒަފުންނަށް ވަކިވަކިން ދެވޭ އުޖޫރައާއި އިނާޔަތްތައް ހިމެނެއެވެ. މި މައުލޫމާތުތަކަކީ ރައްޔިތުންގެ މަސްލަހަތަށްޓަކައި އެއްވެސް މީހަކު އެދުމަކާ ނުލައި ދައުލަތުގެ އިދާރާތަކުން އަމިއްލައަށް ހާމަކުރަންޖެހޭ ތަފުސީލުތަކެކެވެ.
މިނިސްޓްރީތަކުން މި މައުލޫމާތުތައް ހާމަކުރަން ފެށުމަކީ ކުރިއެރުމެއްގެ ގޮތުގައި ފާހަގަކުރައްވަމުން، އިންފޮމޭޝަން ކޮމިޝަނަރު ވަނީ އެ މައުލޫމާތުތައް އަދާހަމަކޮށް ބެލެހެއްޓުމަށާއި، މިނިސްޓްރީތަކުގެ ދަށުން ހިންގާ އެހެން އިދާރާތަކުން ވެސް މިގޮތަށް އަމަލުކުރަމުންދާކަން ކަށަވަރުކުރުމަށް އިލްތިމާސްކުރައްވާފައެވެ. މީގެ ކުރިން އާހިދު ވަނީ ދައުލަތުގެ ވުޒާރާތަކުން އަމިއްލައަށް އިސްނަގައިގެން މައުލޫމާތު ހާމަކުރާ މިންވަރު ދަށްވުމުން އެކަމުގެ ކަންބޮޑުވުން ތަކުރާރުކޮށް ފާޅުކުރައްވާފައެވެ.
މި މައުލޫމާތުތައް އާންމުކުރި ނަމަވެސް، މައުލޫމާތު ހޯދަން އެދި ހުށަހަޅާ އާރުޓީއައި ފޯމުތަކަށް ޖަވާބު ނުލިބޭ މައްސަލަ އަދިވެސް ބޮޑުކަން ފާހަގަކުރެވެއެވެ. މިދިޔަ އަހަރު އިންފޮމޭޝަން ކޮމިޝަނަރުގެ އޮފީހަށް ހުށަހެޅި 712 ޝަކުވާގެ ތެރެއިން ބޮޑު ބަޔަކީ ޖަވާބު ނުލިބިގެން ހުށަހެޅި މައްސަލަތަކެވެ. ސަރުކާރުގެ ބައެއް ވަޒީރުން އާރުޓީއައި ގާނޫނުގެ ބޭނުން ނަހަމަގޮތުގައި ހިފާކަމަށް ވިދާޅުވެ ފާޑުވިދާޅުވި ނަމަވެސް، ކޮމިޝަނަރު ވިދާޅުވީ އެފަދަ ކަމެއް ފާހަގަކުރެވިފައި ނުވާ ކަމަށެވެ.