ދުނިޔޭގެ ލޭ ހަދިޔާކުރާ މީހުންގެ ދުވަހުގެ މުނާސަބަތުގައި، އެއްވެސް ބަދަލަކާ ނުލައި ދަރުމައަށް ލޭ ހަދިޔާކުރާ ފަރާތްތަކުން ކުރާ އަގުހުރި މަސައްކަތުގެ އަގު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަޒަންކުރައްވައިފިއެވެ. މިއަދު އެކްސް މެދުވެރިކޮށް ފޮނުއްވި މެސެޖެއްގައި ރައީސް ވިދާޅުވީ، ލޭ ހަދިޔާކުރާ ފަރާތްތަކުގެ ދީލަތި އެހީތެރިކަމަކީ އިންސާނީ ފުރާނަ ސަލާމަތްކުރުމަށް ލިބޭ ވަރަށް ބޮޑު ބާރެއް ކަމަށެވެ.
ރައީސްގެ މެސެޖުގައި، އުމުރުދުވަހަށް ފަރުވާ ހޯދަންޖެހޭ ބަލިމީހުންނަށާއި ކުއްލި ފަރުވާ ބޭނުންވާ ފަރާތްތަކަށް އެންމެ ބޭނުންޖެހޭ ވަގުތު އެހީތެރިކަން ފޯރުކޮށްދިނުމުގައި ލޭ ހަދިޔާކުރާ މީހުންގެ ދައުރު ބޮޑުކަން ފާހަގަކުރެއްވިއެވެ. ބޭސްވެރިކަމާއި ޓެކްނޮލޮޖީ ކުރިއަރާފައިވީ ނަމަވެސް، ލެޔަކީ އަދިވެސް އޭގެ ބަދަލުގައި އެހެން އެއްޗެއް ބޭނުންކުރެވެން ނެތް މުހިންމު ވަސީލަތެއްކަން އެމަނިކުފާނު ފާހަގަކުރެއްވިއެވެ.
އާންމު ސިއްހަތު ރައްކާތެރިކުރުމަށާއި، ސިއްހީ ޚިދުމަތްތައް ހަރުދަނާކޮށް ގައުމީ ފެންވަރުގައި ކުރިމަތިވެދާނެ ކުއްލި ނުރައްކަލުގެ ހާލަތްތަކަށް ތައްޔާރުވެ އޮތުމަށްޓަކައި ދަރުމައަށް ލޭ ހަދިޔާކުރުމަކީ ކޮންމެހެން ބޭނުންތެރި ކަމެއް ކަމަށް ރައީސް ވިދާޅުވިއެވެ. ވަކިން ހާއްސަކޮށް ރާއްޖެ ފަދަ ޖަޒީރާ ގައުމެއްގައި، ކުއްލި ސިއްހީ ހާލަތްތަކުގައި ބޭނުންވާ ވަގުތަށް ލޭ ލިބުމަކީ ފުރާނަ ސަލާމަތްކުރުމަށްޓަކައި ނުހަނު މުހިންމު ކަމެއްކަމަށް އެމަނިކުފާނު ފާހަގަކުރެއްވިއެވެ.
ލޭ ހަދިޔާކުރުމަށް އާންމުން ހޭލުންތެރިކުރުވުމަށާއި، އެކަކު އަނެކަކަށް އެހީތެރިވުމުގެ ރޫހު އާލާކުރުމަށް މި ސަރުކާރުން އިސްކަމެއްދީ، އެންމެހައި ރައްޔިތުންގެ ސިއްހަތާއި މުޖުތަމައުގެ ލާބައަށްޓަކައި އެންމެން ގުޅިގެން މަސައްކަތްކުރުމުގެ ސަގާފަތެއް ގާއިމުކުރުމަށް ސަރުކާރުން މަސައްކަތްކުރައްވާނެ ކަމުގެ ޔަގީންކަންވެސް ރައީސް ދެއްވިއެވެ.