މެލޭޝިއާގައި ހުންނަ ދިވެހިރާއްޖޭގެ ހައިކޮމިޝަނުން އިންތިޒާމްކޮށްގެން ކުރިއަށްގެންދާ “އެކުއެކީގައި” އޮރިއެންޓޭޝަން ޕްރޮގްރާމްގެ ހަތްވަނަ ސެޝަން ކާމިޔާބުކަމާއެކު ރާއްޖޭގައި ބާއްވައިފިއެވެ. މި ޕްރޮގްރާމަކީ މެލޭޝިއާގައި ތައުލީމު ހާސިލުކުރަމުންދާ އަދި އަލަށް ކިޔަވަންދާ ދަރިވަރުންނަށް ބޭނުންވާ މުހިންމު މައުލޫމާތު ފޯރުކޮށްދިނުމަށް 12 އޮކްޓޯބަރު 2024 އިން ފެށިގެން ސިލްސިލާކޮށް ހިންގަމުން އަންނަ ހަރަކާތެކެވެ.
މި ފަހަރުގެ ސެޝަން ކުރިއަށް ގެންގޮސްފައިވަނީ ޒެޑްއެކްސް އެޑިޔުކޭޝަން ކޮންސަލްޓެންސީ މޯލްޑިވްސްއާ ގުޅިގެންނެވެ. މިއީ މި ސިލްސިލާގެ ތެރެއިން މެލޭޝިއާއިން ބޭރުގައި، އެބަހީ ދިވެހިރާއްޖޭގައި މިފަދަ މައުލޫމާތު ދިނުމުގެ ސެޝަނެއް ބޭއްވުނު ފުރަތަމަ ފަހަރުކަން ހައިކޮމިޝަނުން ފާހަގަކުރައްވައެވެ.
މި ސެޝަން ހާއްސަކޮށްފައިވަނީ މިއަހަރުގެ ސެޕްޓެމްބަރު އަދި އޮކްޓޯބަރު މަހުގެ އިންޓޭކުގައި މެލޭޝިއާގެ އެކި ކޮލެޖުތަކާއި ޔުނިވަރސިޓީތަކުގައި ކިޔެވުމަށް ތައްޔާރުވަމުންދާ ދަރިވަރުންނަށެވެ. މި ޕްރޮގްރާމުގައި 100 އަށްވުރެ ގިނަ ދަރިވަރުން ބައިވެރިވެ، މުހިންމު މައުލޫމާތުތަކެއް އޮޅުންފިލުވާފައިވެއެވެ.
މި ޕްރޮގްރާމްގެ މައިގަނޑު މަގްސަދަކީ މެލޭޝިއާގައި ދިވެހި ދަރިވަރުން ފުރިހަމަ ގޮތުގައި ތައުލީމު ހާސިލުކުރުމަށް މަގުފަހިކޮށްދިނުމެވެ. އެގޮތުން، ބޭރު ގައުމެއްގައި އުޅޭއިރު ނަފްސާނީ ދުޅަހެޔޮކަން ދެމެހެއްޓުމާއި، ކިޔެވުމުގެ ކަންކަން ތަރުތީބުކުރާނެ ގޮތްތަކާ ގުޅޭގޮތުން ދަރިވަރުންނަށް އިރުޝާދު ދީފައިވެއެވެ.
މީގެ އިތުރުން، މެލޭޝިއާގެ އާދަކާދަތަކާއި ސަގާފަތަށް ދަރިވަރުން އަހުލުވެރިކުރުވުމާއި، އެ ގައުމުގައި ހުންނަ ދިވެހި ހައިކޮމިޝަނުން ދަރިވަރުންނަށް ފޯރުކޮށްދޭ ހިދުމަތްތަކުގެ ތަފްސީލުވެސް މި ސެޝަންގެ ތެރެއިން ވަނީ ހިއްސާކޮށްފައެވެ. އަދި ސިއްހީ އަދި ތައުލީމީ ދާއިރާއާ ގުޅުންހުރި މުހިންމު ގަވާއިދުތަކަށް ދަރިވަރުން ހޭލުންތެރިކުރުވާފައިވެއެވެ.
ހައިކޮމިޝަނުން ވިދާޅުވި ގޮތުގައި، މި ޕްރޮގްރާމަކީ ކާމިޔާބު ފަންނީ އަދި ހުނަރުވެރި ޖީލެއް ބިނާކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން ކުރިއަށްގެންދާ މުހިންމު މަސައްކަތެކެވެ. މިފަދަ ޕްރޮގްރާމްތަކުގެ ސަބަބުން ދަރިވަރުންނަށް ބޭނުންވާ މައުލޫމާތު ލިބި، އާ މުޖުތަމައަކަށް ހޭނުމަށް ފަސޭހަވެގެންދާނެއެވެ.
މި ސެޝަން ނިންމާލަމުން ހައިކޮމިޝަނުން ވަނީ، މި ޕްރޮގްރާމްގެ ސަބަބުން ދަރިވަރުންގެ ތައުލީމީ ހަޔާތަށް ހެޔޮ ބަދަލުތަކެއް އަންނާނެ ކަމަށް އުންމީދުކުރާ ކަމަށް ވިދާޅުވެފައެވެ. އަދި ކުރިއަށް އޮތް ތަނުގައިވެސް ދަރިވަރުންގެ ލާބަޔާއި މަންފާއަށް މިފަދަ އިތުރު ހަރަކާތްތައް ހިންގުމަށް ވަނީ ރޭވިފައެވެ.