މަސްވެރިކަމުގެ ސިނާޢަތް ހަރުދަނާކުރުމަށް ސަރުކާރުން ގެންގުޅުއްވާ ހަރުދަނާ ސިޔާސަތުތަކުގެ ދަށުން، މިފްކޯއަށް މަސްގަތުމަށް ދައުލަތުން ދެމުން އައި ސަބްސިޑީ މިހާރު އެއްކޮށް ހުއްޓާލާފައިވާ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ރައްޔިތުންގެ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ، ސިޔާސީ ބޭނުމަށްޓަކައި ވޯޓު ހޯދުމަށް ސަބްސިޑީ ދިނުމުގެ ބަދަލުގައި މިހާރު ސަރުކާރުން އަމާޒު ހިފާފައިވަނީ ސިނާޢަތުގެ އިންފްރާސްޓްރަކްޗަރ ތަރައްޤީކޮށް އަމިއްލަ ފައިމައްޗަށް ކުންފުނި ކޮޅަށް ޖެހުމަށް ކަމަށެވެ.
ވަޒީރު ފާހަގަކުރެއްވި ގޮތުގައި ކުރީ ސަރުކާރުން މަސް ކިލޯއެއްގެ އަގު 25 ރުފިޔާއަށް ބަދަލުކުރުމާ ގުޅިގެން، ކޮންމެ ކިލޯއަކަށް 13 ރުފިޔާގެ ރޭޓުން އަހަރަކު ބިލިޔަނުން ފައިސާ ސަބްސިޑީގެ ގޮތުގައި ދޭންޖެހުނެވެ. ނަމަވެސް އެ ފައިސާ ބޭނުންކޮށްގެން މަސްވެރިކަމުގެ ކެޕޭސިޓީ އިތުރުކުރުމަށް އެކަށީގެންވާ މަސައްކަތެއް ކުރެވިފައި ނުވާކަން ވަޒީރު ފާހަގަކުރެއްވިއެވެ. ވޭތުވެދިޔަ 40 އަހަރު ފެލިވަރު ފެކްޓްރީއަށް އެކަނި ބަރޯސާވެފައި އޮތް އޮތުން ނިމުމަކަށް ގެނެސް، މިހާރު ހުރި 105 ޓަނުގެ ޕްރޮސެސިންގ ކެޕޭސިޓީ ތިން ގުނަ އިތުރުކުރުމުގެ މަޝްރޫޢުތައް ބާރުމިނުގައި ކުރިއަށްދާ ކަމަށްވެސް ވިދާޅުވިއެވެ.
މަސްވެރިކަމުގެ އުފެއްދުންތަކަށް ރަނގަޅު އަގު ހޯދޭނީ މަހަށް އަގު އެއްކޮށްގެން (ވެލިއު އެޑް ކޮށްގެން) ބޭރުކޮށްގެން ކަމަށްވާއިރު، އެކަމަށް ބޭނުންވާ ވަސީލަތްތައް ޤާއިމުކުރުމުގެ މަސައްކަތް ސަރުކާރުން ވަނީ ފަށާފައެވެ. އެގޮތުން ހުޅުމާލޭގައި 100 މެޓްރިކް ޓަނުގެ ކަންނެލި ބަންދުކުރާ ކާރުޚާނާއެއް ބިނާކުރުމަށް މިހާރު ބަޔަކާ ހަވާލުކޮށްފައިވާ ކަމަށާއި، ކުރިއަށް އޮތް 18 މަސްދުވަހުގެ ތެރޭގައި އެތަނުގެ މަސައްކަތް ނިމި އޮޕަރޭޝަނަށް ގެނެވޭނެ ކަމަށް ވަޒީރު ޝިޔާމް ވިދާޅުވިއެވެ. މިއީ މަސްވެރިންނަށް ލިބޭ އާމްދަނީ އިތުރުކުރުމަށް އެޅޭ މުހިންމު ފިޔަވަޅެއްގެ ގޮތުގައި ވަޒީރު ސިފަކުރެއްވިއެވެ.
ސަރުކާރުގެ އަމާޒަކީ ސަރުކާރު ހިއްސާވާ ކުންފުނިތަކާއި އަމިއްލަ ވިޔަފާރިތައް ގުޅިގެން، ދެމެހެއްޓެނިވި ގޮތެއްގައި މަސްވެރިކަމުގެ ސިނާޢަތް ކުރިއެރުވުން ކަމަށް ވަޒީރު ވިދާޅުވިއެވެ. މި ބަދަލާއެކު މިފްކޯއަކީ އަމިއްލަ އާމްދަނީން ހިންގާ، ދައުލަތަށް ބުރަ ނުވާނެ ކުންފުންޏަކަށް ހެދުމަށް ކުރާ މަސައްކަތުގެ ހެޔޮ ނަތީޖާ މިހާރު ފެންނަން ފަށާފައިވާ ކަމަށްވެސް ޝިޔާމް ވިދާޅުވިއެވެ.