ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންނާ ބައްދަލުކުރެއްވުމަށް ބާއްވަވާ “ރައްޔިތުންގެ އަޑު” ސިލްސިލާގައި ބައިވެރިވުމަށް އިތުރު ހަތަރު ދާއިރާއަކަށް ފުރުޞަތު ހުޅުވާލައިފިއެވެ. މިފަހަރު ނަން ހުށަހެޅުމަށް ހުޅުވާލާފައިވަނީ މާފަންނު ދެކުނު ދާއިރާ، އުނގޫފާރު ދާއިރާ، ކެލާ ދާއިރާ، އަދި ފުވައްމުލަކު ދެކުނު ދާއިރާގެ ރައްޔިތުންނަށެވެ. މި ބައްދަލުވުމުގައި ބައިވެރިވާން ބޭނުންވާ ފަރާތްތަކުން އަންނަ ހޯމަ ދުވަހުގެ ރޭގަނޑު 12:00 ގެ ކުރިން ރައީސް އޮފީހުގެ ޚާއްޞަ ޕޯޓަލް މެދުވެރިކޮށް ނަން ނޯޓުކުރަން ޖެހެއެވެ.
މި ޕްރޮގްރާމަކީ ރައީސުލްޖުމްހޫރިއްޔާއާ ބައްދަލުކޮށްލަން ބޭނުންވާ ރައްޔިތުންނަށް ވީހާވެސް ފުޅާ ދާއިރާއެއްގައި އެ ފުރުޞަތު ފަހިކޮށްދިނުމަށް ފެއްޓެވި ސިލްސިލާއެކެވެ. މީގެ ކުރިންވެސް ހުޅުމާލެ އުތުރު ދާއިރާ، ހުޅުދޫ ދާއިރާ، ހޯރަފުށި ދާއިރާ އަދި ހުޅުމާލެ މެދު ދާއިރާގެ ރައްޔިތުންނަށް ވަނީ މި ފުރުޞަތު ހުޅުވާލާފައެވެ. ރައީސް އޮފީހުން ވިދާޅުވި ގޮތުގައި، މި ބައްދަލުވުންތަކުގައި ބައިވެރިވުމުގެ އުސޫލުތައް އެ އޮފީހުގެ ވެބްސައިޓުން މިހާރު ފެންނަން ހުންނާނެއެވެ.
ރައްޔިތުންނާ ބައްދަލުކުރެއްވުމަށް ނިންމަވާފައިވާކަން ރައީސް މުޢިއްޒު އިޢުލާންކުރެއްވީ ޕީއެސްއެމްގެ “ނޭޝަންޗެޓް” ޕްރޮގްރާމްގައި ވާހަކަފުޅު ދައްކަވަމުންނެވެ. މި ސިލްސިލާގެ މައިގަނޑު މަޤްޞަދަކީ ވަކިވަކި ދާއިރާތަކުގެ ރައްޔިތުންނާ ސީދާ ބައްދަލުކުރައްވައި، އެމީހުންގެ ޝުޢޫރުތަކާއި ކަންބޮޑުވުންތައް އަމިއްލަފުޅަށް އަޑުއެއްސެވުމެވެ. މިއީ ރައްޔިތުންނާ ގާތުން މަސައްކަތްކުރެއްވުމަށް އެމަނިކުފާނު ގެންގުޅުއްވާ ސިޔާސަތުގެ ދަށުން ކުރިއަށްގެންދާ މުހިންމު ހަރަކާތެކެވެ.
ވެރިކަމާ ހަވާލުވެވަޑައިގަތުމަށްފަހު ރައީސް މުޢިއްޒު ގެންދަވަނީ ރައްޔިތުންގެ އަޑު ގާތުން އެއްސެވުމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން ވޭތުވެދިޔަ ދެ އަހަރުގެ ތެރޭގައި ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެން، ހުރިހާ ރަށު ކައުންސިލްތަކާ ބައްދަލުކުރައްވައި ރަށްރަށުގެ ތަރައްޤީއަށް ބޭނުންވާ ކަންކަމާ ގުޅޭގޮތުން މަޝްވަރާ ކުރައްވާފައިވެއެވެ. “ރައްޔިތުންގެ އަޑު” ޕޯޓަލް މެދުވެރިކޮށް މިހާރު މިވަނީ އާންމު ރައްޔިތުންނަށް ސީދާ ރައީސާ ބައްދަލުކުރުމުގެ މަގު އިތުރަށް ތަނަވަސްވެފައެވެ.