ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެއްވެސް މެންބަރަކު ހަމަނުޖެހުން އުފެއްދުމަށާއި ގައުމީ މަސްލަހަތަށް ގެއްލުންވާ ފަދަ ސިޔާސީ ހަރަކާތްތަކަށް ޖާގަދީގެން ނުވާނެ ކަމަށާއި، ޕާޓީގެ މަސްލަހަތަށްވުރެ ގައުމީ މަސްލަހަތު އިސްކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ފެށުނު ޕީއެންސީ ކޮންގްރެސްގެ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ޕާޓީގެ މެންބަރުން އަބަދުވެސް ޕާޓީގެ މަސްލަހަތަށްވުރެ ގައުމީ މަސްލަހަތު އިސްކޮށް، ގައުމުގެ ކުރިއެރުމަށް މަސައްކަތް ކުރުމުގައި ސާބިތުވެ ތިބެންޖެހޭނެ ކަމަށެވެ. އަދި ބައެއް ސިޔާސީ ފަރާތްތަކުން ޒިންމާދާރުކަން ކުޑަ ގޮތެއްގައި ހަރަކާތްތެރިވެ ހަމަނުޖެހުން އުފައްދަން މަސައްކަތް ކުރި ނަމަވެސް، ޕީއެންސީން އެފަދަ ކަންކަމަށް އެއްވެސް ފުރުސަތެއް ނުދޭނެ ކަމަށް އެމަނިކުފާނު ފާހަގަކުރެއްވިއެވެ.
ރައީސް އިތުރަށް ވިދާޅުވީ ޕީއެންސީގެ އެޖެންޑާ ބިނާވެފައިވަނީ ގައުމު އިސްކުރުމަށާއި، ގައުމަށް ފައިދާހުރި ކަންކަން ކުރުމަށާއި، އަމަންއަމާންކަމާއި ހަމަޖެހުން ދެމެހެއްޓުމުގެ އިތުރުން ގައުމީ ތަރައްގީ ކުރިއެރުވުމުގެ މައްޗަށް ކަމަށެވެ. އަދި މި ޕާޓީން އިސްލާމްދީނާއި، ދިވެހިންގެ ސަގާފީ ތަރިކައާއި، ގައުމީ ވަންތަކަން ހިމާޔަތްކޮށް، ރާއްޖޭގެ ސުލްހަ މަސަލަސްކަމާއި، ރައްކާތެރިކަމާއި، ތަރައްގީ ދަމަހައްޓާނެ ކަމަށްވެސް އެމަނިކުފާނު ވިދާޅުވިއެވެ.
ޕީއެންސީއަކީ ވަކިވަކި ފަރުދުންގެ އަމިއްލަ މަސްލަހަތަށްވުރެ ގައުމީ މަސްލަހަތު އިސްކުރާ ޒިންމާދާރު ސިޔާސީ ޕާޓީއެއް ކަމަށް ރައީސް މުއިއްޒު ތަކުރާރުކޮށް ފާހަގަކުރެއްވިއެވެ.
މިއަދު ފެށުނު ޕީއެންސީގެ ކޮންގްރެސް އޮކްޓޯބަރު 18 ވަނަ ދުވަހުގެ ނިޔަލަށް ކުރިއަށްދާނެއެވެ. ރައީސް ވިދާޅުވި ގޮތުގައި، 78،505 އަށްވުރެ ގިނަ މެންބަރުންނާއެކު ޕީއެންސީއަކީ މިހާރު ރާއްޖޭގައި އޮތް އެންމެ ބޮޑު ސިޔާސީ ޕާޓީއެވެ.