އިޙްސާންކަމުގައި، ގާތްތިމާގެ މީހުންނާ އޮންނަ ރަޙިމުގެ ގުޅުން ދެމެހެއްޓުންވާ ކަމަށާއި، ރަޙިމުގެ ގުޅުން ދެމެހެއްޓުމަކީ، ސުވަރުގެ ވަނުމަށް މަގުފަހިވާ ކަމެއް ކަމަށް މިއަދުގެ ހުކުރު ޙުތުބާގައި ބުނެފިއެވެ.
މިއަދުގެ ހުކުރު ޙުތުބާ ޙާއްސަކޮށްފައިވަނީ “އިހްސާންތެރިކަން” މި މައުޞޫއު އަށެވެ.
މިއަދުގެ ޙުތުބާގައި ވަނީ އިޙްސާންކަމަކީ، އިޚްލާޞްތެރިކަމާއި، ތެދުވެރިކަމާއި، ހެޔޮކޮށް ހިތުމެވެ. އެއީ އިސްލާމްކަމާއި، އީމާންކަމަށް ފަހު، މުއުމިނެއްގެ ޙަޔާތުގައި، ނުހަނު މަތިވެރި ދަރަޖައެއް ލިބިގެންވާ ކަމެއް ކަމަށް ބުނެފައެވެ.
އިޙްސާންކަމަކީ، މުކައްލަފެއްގެ އެންމެހައި ޢަމަލުތަކުގައި ހުރުން ލާޒިމު ސިފައެއް ކަމަށާއި، އެއީ އިންސާނާގެ އިސްލާމްކަމާއި، އީމާންކަމާއި، އަޅުކަމުގައި ހުރުން ލާޒިމް ސިފައެއް ކަމަށް ބުނެފައެވެ.
އިންސާނާ އެހެންމީހުންނާ ކުރާ މުޢާމަލާތުގައްޔާއި، އަމިއްލަ ނަފުސަށް ކުރާ މުޢާމަލާތުގައި ވެސް އަދި އޭނާގެ މާލީ މުޢާމަލާތާއި، އަބުރު ހިފެހެއްޓުމާއި، ޢިލްމު އުނގެނުމާއި، އެންމެހައި ޢަމަލުތަކުގައި އަދި އަޅުކަމުގައި އިޙްސާންތެރިކަން ހުންނަން ޖެހޭނެކަމަށް ޙުތުބާގައި ވަނީ ބުނެފައެވެ. އަދި އިޙްސާންތެރިކަމަކީ، މާތް ﷲގެ އެއްކައުވަންތަކަން ޤަބޫލުކޮށް، އެކަލާނގެއާ އެހެން ފަރާތެއް ބައިވެރިނުކުރުން ކަމަށް ޙުތުބާގައި ވަނީ ބުނެފައެވެ.
“މާތް ﷲ ވަޙީކުރައްވާފައިވާ ބަސްފުޅެއްގެ މާނައިގައި ވެއެވެ. “ފަހެ، ﷲ މެނުވީ (ޙައްޤުވެގެން އަޅުކަމެއްވެވޭ) إلَـٰه އަކު ނުވާކަން، ކަލޭގެފާނު ދެނެވަޑައިގަންނަވާށެވެ!” ހުރިހައި ކަމެއް މިންވަރުކުރައްވަނީ، މާތް ﷲކަން ޤަބޫލުކޮށް، މިންވަރަށް އީމާންވުމަކީ ވެސް އިޙްސާންކަމުގެ ތެރެއިންވާ ކަމެކެވެ.” – ޙުތުބާ
ޙުތުބާގައި ވަނީ އިޙްސާންކަމުގައި، ގާތްތިމާގެ މީހުންނާ އޮންނަ ރަޙިމުގެ ގުޅުން ދެމެހެއްޓުން ވާކަމަށާއި، އެއީ، ޢުމުރާއި ރިޒްޤުގައި ބަރަކާތް ލައްވައި، މަރުމަތި އަމާންވާނޭ ކަމެއް ކަމަށް ބުނެފައެވެ. އަދި އެއީ ސުވަރުގެ ވަނުމަށް މަގުފަހިވާ ކަމެއް ކަމަށް ޙުތުބާގައި ވަނީ ބުނެފައެވެ.
އަދި ގާތްތިމާގެ މީހުން ފިޔަވައި ޔަތީމުންނާއި، މިސްކީނުންނާއި، ހަނގުރާމައިގެ އަސީރުން ފަދަ ނިކަމެތީންނަށް އެހީތެރިކަން ފޯރުކޮށްދީ، ކާންދީ އުޅުމަކީ ވެސް އިޙްސާންތެރިކަމުގެ ތެރޭގައި ހިމެނޭ މުހިންމު ބައެއްކަން ޙުތުބާގައި ފާހަގަކޮށްފައި ވެއެވެ.