ކ. ދިއްފުށީގައި ހަރަކާތެއް ހިންގާނަމަ އެކަމުގެ އެންމެ ކުރީގައި އަތުކުރި އޮޅާލައިގެން ތިބޭ އެއްބަޔަކީ އެސޯސިއޭޝަން ފޯ ދިއްފުށީ ޑިވެލޮޕްމަންޓް (އެޑް)ގެ ހީވާގި މެމްބަރުންނެވެ. ދިއްފުއްޓާއި ދިއްފުށީ ރައްޔިތުންގެ ތަރައްގީ އާއި ގުޅުންހުރި ކޮންމެ ކަމެއްގައިވެސް އެންމެ އިސް ސަފަށް މި ޖަމިއްޔާއިން ނުކުންނަނީ ރަށަށް ދެވިފައި އޮންނަ ހާއްސަ ލޯތްބެއްގެ ސަބަބުންނެވެ.
2019 ވަނަ އަހަރުގެ އޮގަސްޓް މަހުގެ 19 ވަނަ ދުވަހު ރަސްމީކޮށް ރަޖިސްޓްރީ ކުރެވުނު އެޑް ޖަމިއްޔާއަށް ފަސް އަހަރު ފުރިފައިވާއިރު، މި ޖަމިއްޔާ ވުޖޫދަށް އައިސް، މިވީ މަދު އަހަރުތަކުގެ ތެރޭގައި ދިއްފުށި ވަނީ ހައިރާންކޮށްލާފައެވެ. އެޑްގެ ކޯ ފައުންޑާއެއް ކަމަށްވާ ހަސަން ރަޝީދު ބުނިގޮތުގައި އެޑްގެ މައިގަނޑު މަޤްޞަދަކީ ހޭލުންތެރިކަމުގެ ތެރެއިން ތަރައްޤީ ހޯދައި، ހޭލުންތެރި މުޖުތަމަޢުއެއް ބިނާކުރުމެވެ.
ރަށުގެ ތަރައްޤީގެ ކަންކަމުގައި އެހީތެރިވުމުގެ މަތިވެރި މަޤްޞަދުގައި އުފެދުނު މި ޖަމިއްޔާގެ މުއައްސިސުންނަކީ ހަސަން ރަޝީދު އަދި ހުސެއިން މުނާޒެވެ. އެޑްގެ ފުރަތަމަ އެގްޒެކެޓިވް ކޮމިޓީގައި ހިމެނެނީ ހަމައެކަނި ރަށުގެ ޒުވާނުންނެވެ. އަދި ޖަމިއްޔާގައި މަސައްކަތްކުރި ދެ ޒުވާނުން މިހާރު ރަށު ކައުންސިލްގައިވެސް މަސައްކަތްކުރަމުން ދާކަން ހަސަން ވަނީ ފާހަގަކޮށްފައެވެ. މީގެއިތުރުން ރަށުގެ ކައުންސިލާއި، ވިޔަފާރިވެރިންނާއި އަދި އާންމު ރައްޔިތުންގެ އެހީތެރިކަންވެސް ހަސަން ފާހަގަކޮށްފައިވެއެވެ.
ދިގު އެހެނަސް ކާމިޔާބު ދަތުރެއް!
ހަސަން ބުނިގޮތުގައި ޖަމިއްޔާއެއް އުފެދުމުގެ ހިޔާލު އެންމެ ފުރަތަމަ އައީ 2013 ވަނަ އަހަރުގައެވެ. އަދު 2016 ވަނަ އަހަރުން ފެށިގެން ޓީމެއް އެކުލަވާލައި، އާންމުންނަށް އަމާޒުކޮށްގެން އެކި އިވެންޓުތައް ބާއްވަން ފެށިއެވެ. އޭގެތެރޭގައި ޒުވާނުންނަށް އަމާޒުކޮށް އެކި ހަރަކާތްތަކާއި، މަސްވެރިންގެ ދުވަސް ފާހަގަކުރުމާއި އަދި ތިމާވެއްޓާއި ގުޅުންހުރި މަސައްކަތްތައް ފާހަގަކޮށްލެވެއެވެ. އެކި ސަބަބުތަކާ ހުރެ ލަސްވަމުން ގޮސް ރަސްމީކޮށް އެޑް ޖަމިއްޔާ ރަޖިސްޓްރީ ކުރެވުނީ 2019 ވަނަ އަހަރުގަ އެވެ.
ހަސަން ބުނިގޮތުގައި ކުރިން ރަށުގައި ދެ ޖަމިއްޔާއެއް ހިންގަމުން ދިޔަ ނަމަވެސް، އެޑްގެ މަޤްޞަދަކަށްވީ ތަންކޮޅެއް ފުޅާ ދާއިރާއެއްގައި ރަށުގެ ތަރައްގީއަށް މަސައްކަތްކުރުމެވެ. އެގޮތުން އަންހެނުންނާއި ޒުވާނުން ބާރުވެރިކުރުވައި، ކުޅިވަރާއި ތަޢުލީމު ކުރިއެރުވުން އަދި ތިމާވެއްޓާއި ސިއްހީ ކަންކަމަށް ހޭލުންތެރިކުރުވުމަށް އެ ޖަމިއްޔާއިން ހާއްސަ އިސްކަމެއް ދެއެވެ.
މަދު ދުވަސްކޮޅެއްގެ ތެރޭގައި ބޮޑު ތަރުހީބެއް!
ދިއްފުށީގެ ތަރައްޤީއަށް އެޑް ޖަމްޢިއްޔާއިން ފާއިތުވި މަދު ދުވަސްތަކެއްގެ ތެރޭގައި ވަނީ ގިނަގުނަ މަސައްކަތްތަކެއް ކޮށްފައެވެ. އެގޮތުން ފާއިތުވި ބޮޑު އީދުގައިވެސް އެޑްއިން އިސްނަގައިގެން ދިއްފުށީގައި ވަނީ ފޯރިގަދަ ހަރަކާތްތަކެއް ކުރިއަށް ގެންގޮސްފައެވެ.
އެޑް އިން މިހާތަނަށް ކުރި ހުރިހާ މަސައްކަތެއްގެ ތެރެއިންވެސް އެރަށަށް އުދައަރާ ލިބޭ ގެއްލުންތަކާ ގުޅިގެން ކަމާބެހޭ ފަރާތްތަކުގެ ސަމާލުކަމަށް ގެނައުމަށް އެ ޖަމިއްޔާއިން ތައްޔާރުކުރި ވީޑިއޯ ހަސަން ވަނީ ފާހަގަކޮށްފައެވެ. 2021 ވަނަ އަހަރުގެ ތިމާވެށީގެ ދުވަހާއި ދިމާކޮށް ތައްޔާރުކުރި މި ވީޑިއޯ ވައިރަލްވެ އެންވަޔަރަންމަންޓް މިނިސްޓްރީ އަދި ޔޫއެންޑީޕީގެ ސަމާލުކަން ވަނީ ލިބިފައެވެ.
އަދި ހަމަ އެ އަހަރު އެޑް އިން ކުރިއަށް ގެންދިޔަ “ދިވެހިންނާއެކު ފަލަސްތީން” ފަންޑްރެއިޒިން އިވެންޓާއި، 2019 ގައި ޖަމިއްޔާ އުފެދުމަށްފަހު އެންމެ ފުރަތަމަ ބޭއްވި އިވެންޓްކަމަށްވާ މަސްވެރިންގެ ދުވަސް ފާހަގަކުރުމަކީވެސް ފާހަގަކޮށްލެވޭ އިވެންޓްތަކެވެ.
ފާއިތުވި ތަނުގައި ނުކުރެވި ހުރި ކަންކަމަށް އިސްކަންދިނުމުގެ ގޮތުން ސިއްޙީ ދާއިރާގެ ބޭފުޅުން ދިއްފުއްޓަށް ގެނެސްގެން މަޢުލޫމާތު ދިނުމަށް ހަމަޖެހިފައިވާކަމަށްވެސް ހަސަން ބުނެފައިވެއެވެ. އަދި ކުރިއަށް އޮތްތަނުގައި އެޑްގެ ދެވަނަ ދައުރުގެ އެ ޖަމިއްޔާގެ އެކްސްކޯ އާކުރުމާއެކު، ރަށުގެ ތަރައްޤީއަށް އެ ޖަމިއްޔާއިން އިސް ނަގައިގެން ގިނަ ކަންކަން ކުރުމަށް ވަނީ ޕްލޭންކޮށްފައެވެ.
ދިއްފުށީގެ ތަރައްގީ އާއި ރައްޔިތުންގެ ހޭލުންތެރިކަމަކީ އެ ޖަމިއްޔާއިން އެންމެ އިސްކަންދޭކަން ކަމަށް ފާހަގަކޮށް ހަސަން ވަނީ “އެބައެއްގެ ހޭލުންތެރިކަމެއް ނެތި އެއްވެސް ތަނެއް ތަރައްޤީ ނުވާނެ” ކަމަށް ބުނެފައެވެ.